Сакам да бидам јасен за влијанието врз односите со САД ако С Македонија избере друг пат – ако се реши против уставни измени, ако заталка од патот кон ЕУ. Тоа би било загрижувачки за една членка на НАТО, земја за која се обврзавме дека ќе ја браниме врз основа на заедничките вредности, кажа американскиот сенатор Крис Марфи
Освен што ја изрази силната поддршка на Соединетите Американски Држави во одлуката Северна Македонија да се приклучи кон Европската Унија и ги повика пратениците да ги изгласаат уставните измени, американскиот сенатор Крис Марфи, во дел од своето денешно обраќање од прес-центарот на Владата, предупреди и дека неспроведувањето на измените во Уставот ќе се одрази на односите помеѓу САД и земјава.
„Сакам да бидам јасен за влијанието врз односите со САД ако С Македонија избере друг пат – ако се реши против уставни измени, ако заталка од патот кон ЕУ. Тоа би било загрижувачки за една членка на НАТО, земја за која се обврзавме дека ќе ја браниме врз основа на заедничките вредности“,
кажа американскиот сенатор Марфи.
Тој го нагласи пријателскиот однос меѓу земјава и САД, за кој кажа дека нема да престане и во иднина, но додаде дека лидерите во Соединетите Американски Држави ќе го набљудуваат изборот што земјава ќе направи во наредните месеци.
„Се надеваме дека вашиот избор безбедносно да се приклучите во НАТО ќе се надополни со слична одлука да ѝ се приклучите на ЕУ“,
заклучи Марфи.