Граѓаните што имаат потреба да извадат некаков документ од државните институции, тоа да го направат по електронски пат, апелира министерот за информатичко општество и администрација, Дамјан Манчевски.
„На порталот uslugi.gov.mk во моментов се достапни 128 услуги. Потврдите и различните видови документи од Управа за водење на матичните книги, Агенцијата за вработување, Министерството за труд и социјална политика, фондовите за здравствено и пензиско осигурување и слично, се достапни електронски. Значи, нема причина граѓаните физички да доаѓаат до институциите, ова е со цел да се намали фреквенцијата и изложувањето на ризик од коронавирусот“,
изјави Манчевски.
Манчевски најави дека наскоро и телекомуникациските оператори преку СМС-пораки ќе почнат да ги информираат граѓаните за владините мерки за превенција од коронавирусот.