Претседателот Александар Вучиќ ја има поддршка на Србите од Македонија и Македонците со српско потекло! Во огромен број се упативме кон Белград за да ја поддржиме политиката на мир, слога и стабилност, се наведува во објавата на здружението
„Многу нè има!“, се вели во објавата на здружението „Мир, слога, стабилност“ од Скопје во чија организација голем број Срби и Македонци со српско потекло од земјава заминаа за Белград, каде што вечерва треба да се одржи собирот што го организира српскиот претседател Александар Вучиќ, кој неговата власт го најавува како најголем во историјата.
Во прилог, здружението сподели и фотографии од луѓето кои со автобуски превоз се на пат кон Белград за да му дадат поддршка на српскиот претседател.
Тие, како што може да се види, се облечени во бели елеци и капчиња со логото на здружението, како и логото со стилизираните иницијали на српскиот претседател – AV.
„Претседателот Александар Вучиќ ја има поддршка на Србите од Македонија и Македонците со српско потекло! Во огромен број се упативме кон Белград за да ја поддржиме политиката на мир, слога и стабилност!“,
се наведува во објавата на здружението.
Претходно здружението на социјалните мрежи објави повик до сите заинтересирани за собирот за поддршка на човекот кој, како што се вели во објавата, го посвети животот на Србија.
„Да го поддржиме човекот кој животот го посвети на Србија! Одважи се на повикот на претседателот Вучиќ и дојди со нас во Белград! Организираме превоз до Белград на 26.5 (петок) на најголемиот собир досега одржан во Србија, а сите заинтересирани нека се обратат на телефонскиот број на здружението и нека го резервираат своето место. Да живее Србија“,
стои во повикот.
Српската телевизија Н1 пред неколку дена објави репортажа од земјава по повод превозот на македонски државјани на митингот. Освен од Скопје, автобуси за собирот на Вучиќ ќе пристигнат и од Куманово и од други градови во Северна Македонија.
Екипата на српската телевизија го лоцира седиштето на здружението „Мир, слога, стабилност“ во заградата на поранешниот премиер Никола Груевски. Неговото име, како што се забележува, потсетува на последниот изборен слоган на Вучиќ кој гласеше: „Мир, стабилност, Вучиќ“.
Претседателот на здружението пред камерата на Н1 негираше дека организира превоз, но на телефонскиот број оставен во огласот се даваа детални информации за местото на тргнување и за тоа дека ќе има бесплатни сендвичи и вода.
Репортажата на српската телевизија опфати уште еден организатор на превоз за митингот во Белград, во Куманово. Таму, како организатор се јавува Мирослав Тричковиќ, кој инаку е советник во Советот на Општина Куманово од ВМРО-ДПМНЕ и коалицијата. Тој не негираше дека на негова иницијатива се организира превозот во Белград.
Стотици автобуси од цела Србија и од Косово од раните утрински часови пристигаат во Белград на митингот на Вучиќ. Како што јавува Н1, автобусите се паркирани пред Палатата на Србија и пред српскиот парламент.
Камерата на Н1 денеска во Ниш забележала луѓе како се собираат пред железничката станица со транспаренти „Секогаш со Вучиќ“, но и со интересни симболи на облеката.
Неколку од нив, покрај ликот на Вучиќ, на нивните бели маички ги носеа и логоата на телевизиите Пинк и Хепи, пренесува телевизијата. Инаку, одземање на националните фреквенции од телевизиите Пинк и Хепи е едно од барањата на протестите под слоганот „Србија против насилството“ што почна да ги организира дел од опозицијата по двете масовни убиства.
Собирот на Српската напредна партија (СНС) наречен „Србија на надежта“ ќе се одржи вечерва на плоштадот Никола Пашиќ, пред Домот на Народното собрание. Дел од јавноста собирот го гледа како контрапротест, со оглед на масовните демонстрации на опозицијата.