Денешниот натпревар беше последен за Горан Пандев, капитенот на генерацијата која го постигна најголемиот успех во историјата на македонскиот фудбал
Македонската фудбалска репрезентација загуби од Холандија со 3:0 во својот последен настап на 16. Европско првенство.
Стрелци на головите беа Мемфис Депај во 24. минута и Џорџињо Вајналдум (51. и 58. минута).
Избраниците на селекторот Игор Ангеловски не успеаја да освојат ниту еден бод на трите средби во Ц-групата, но прикажаа добри игри и можеби со малку повеќе среќа ќе беа поуспешни.
Денешниот натпревар беше последен за Горан Пандев, капитенот на генерацијата која го постигна најголемиот успех во историјата на македонскиот фудбал.
Громогласни аплаузи од холандските и македонските навивачи доби Пандев во 69. минута кога беше заменет на неговиот последен натпревар во дресот со националниот грб.
Соиграчите застанаа во шпалир и му оддадоа почит на својот капитен кој беше нивен предводник до најголемиот успех, пласманот на ЕВРО 2020.
„Гранде Пандев“ дводецениската репрезентативната кариера ја заврши со 122 настапа и 38 погодоци.
Мечот со Холанѓаните можеби е последен и за Ангеловски на селекторската функција, бидејќи неговиот договор со Фудбалската федерација на Македонија завршува на крајот на месецот.