Како што претходно соопшти и Министерството за надворешни работи (МНР), двајца од загинатите македонски државјани се по потекло од Македонска Каменица, односно 33-годишниот З.С. и 31-годишниот А.К. Третиот загинат е со иницијли В.И. (30) и е по потекло од село Пекљани, Виничко
Општина Македонска Каменица прогласи тридневна жалост по синоќешната трагична сообраќајна несреќа во Италија во која животите ги загубија тројца македонски државјани.
Како што претходно соопшти и Министерството за надворешни работи (МНР), двајца од загинатите се по потекло од Македонска Каменица, односно 33-годишниот З.С. и 31-годишниот А.К. Третиот загинат е со иницијли В.И. (30) и е по потекло од село Пекљани, Виничко.
„Советот на Општина Македонска Каменица на вонредна седница едногласно донесе одлука да прогласи тридневна жалост на 11, 12 и 13 Април 2023 година – вторник, среда и четврток. Момчиња, почивајте во мир. Нека Ви е светол патот во вечноста. Секогаш ќе се сеќаваме на Вас“,
се вели во соопштението на Советот на Општина Македонска Каменица.
Од Советот на Општината додаваат дека ќе биде разгледана и можноста за одобрување на финансиски средства за семејствата на загинатите во сообраќајката.
Тешката сообраќајна несреќа, како што првично објавија италијанските медиуми, а подоцна потврди и македонското МНР, се случила доцна синоќа во градот Ница Монферато, во италијанската провинција Асти, дел од регионот Пиемонт. Тројцата македонски државјани биле во еден автомобил, а се судриле со возило што било управувано од 23-годишен Италијанец, кој е четвртата жртва во несреќата.
Италијанските медиуми информираа дека судирот помеѓу возилата се случил на тесна и опасна кривина на која имало многу тешки сообраќајки и во минатото. На самото место бргу пристигнале екипи на Брза помош и пожарникари кои се обиделе да ги извлечат патниците, но не успеале да ги спасат.