Оставката на премиерот Зоран Заев денеска беше констатирана во парламентот, без тој усно да ја образложи пред пратениците, по што беше прекината и закажаната седница за пратенички прашања
Пратениците од опозицијата претпладнево со аплауз ја поздравија оставката на премиерот Зоран Заев, која беше констатирана во Собранието, на почетокот на седницата за пратенички прашања, која потоа беше прекината.
„Очигледно, тоа што не ви успеа тогаш со 61 глас ви успеа сега, па аплаудирате за оставката на Владата“,
рече спикерот Талат Џафери откако ја констатира оставката на Заев, која повлекува оставка на целата Влада, а алудирајќи на неуспешниот обид на опозицијата да му изгласа недоверба на владиниот кабинет.
Околу еден и пол месец откако Владата го „преживеа“ тестот на доверба во парламентот, Заев ја поднесе вчера до претседателот на Собранието Талат Џафери оставката на премиерската функција, што ја најави ноќта на 31 октомври, по вториот круг од локалните избори. Оставката денес беше констатирана без премиерот Заев усно да ја образложи. Во доставената оставка Заев наведе дека ваквата одлука ја презел како логичен чекор што произлегува од исходот на локалните избори и како израз на преземената одговорност за изборните резултати.
На денешната собраниска седница Џафери објави дека оставка од позицијата си поднел и потпретседателот на Собранието Фадил Зендели, кој е од редовите на Беса.
Пред денешната собраниска седница Џафери на брифинг со новинари соопшти дека од денес Владата е во оставка, но останува на функцијата до избор на нова влада. Од денес, како што рече, почнуваат да течат и роковите за спроведување на дејствијата за избор на нова влада, што подразбира 10 дена во кои шефот на државата треба да го даде мандатот и уште најмногу 20 дена во кои мандатарот треба да го состави кабинетот и да ја напише програмата за работа и да ја достави во Собранието.
Според тоа, новата влада би можела да биде избрана во парламентот до крајот на следниот месец, доколку се чекаат последните рокови, вклучително со терминот во кој треба да се одржи собраниската седница. Доколку процесот оди побрзо и се скратат роковите, изборот на новата влада би можел да заврши и кон средината на јануари, со оглед на тоа што коалициските партнери веќе ги имаат договорено повеќето детали.