Изјавата на министерот следеше по средбата со преставниците на Синдикалната организација на вработените во Филхармонија, кои претходно денеска протестираа пред Министерството за култура и туризам. Како што побараа и во отвореното писмо испратено до премиерот и до министерот за култура од пред една недела, и денеска на протестот пред Култура, вработените во Филхармонија апелираа да се почитуваат законските одредби при изборот на нов директор на институцијата
Министерот за култура и туризам Зоран Љутков уверува дека изборот на нов директор на Македонската филхармонија ќе биде законски. Информира дека има пет кандидати за директорското столче во Филхармонија, а избран, како што рече, ќе биде оној којшто ги исполнува сите услови согласно законот.
„Се разбира ќе биде законски (изборот на нов директор на Филхармонија н.з.). На 17 февруари заврши конкурсот, денеска е избрана комисијата. Сега бев информиран дека се пристигнати пет апликации. Има пет кандидати за директор. Комисијата ќе работи во наредниве денови и ќе ми достави извештај од пристигнатите кандидатури. Директор ќе биде оној којшто ги исполнува сите услови коишто постојат во законот. Не би сакал однапред да се сугерира дека ќе биде незаконски конкурсот. Јас незаконски не работам“,
изјави Љутков.
Изјавата на министерот следеше по неговата средба со преставниците на Синдикалната организација на вработените во Филхармонија, кои претходно денеска протестираа пред Министерството за култура и туризам.
Како што побараа и во отвореното писмо испратено до премиерот и до министерот за култура од пред една недела, и денеска на протестот пред Култура, вработените во Филхармонија апелираа да се почитуваат законските одредби при изборот на нов директор на институцијата.
„Наше е да реагираме, наше е да се плашиме кога претходно пред да биде распишан конкурсот од политичари, од вицепремиер, дознаваме кој ќе биде директор со име и презиме, со што се нарушува легитимноста на конкурсот. И затоа наше беше денеска да протестираме и да покажеме дека сме загрижени. Верувам министерот ќе си го одржи неговиот збор“,
изјави Владимир Лазаревски од Синдикалната организација на вработените во Македонската филхармонија.
Во однос на наводите на вработените во Филхармонија, оти имало политички договор дека директорското сточле во институцијата ќе го добие Мустафа Имери, за што тврдат дека првиот вицепремиер и министер Изет Меџити објавил уште во јуни лани, пред формирањето на новата влада, министерот вели:
„Многу ми е жал што името на Мустафа Имери излезе на таков начин. Ќе кажам дека постои конкурс и дека ќе биде избран тој што ги исполнува сите услови, законски“,
вели Љутков.
Минатата недела, во отворено писмо испратено до премиерот Христијан Мицкоски и до министерот за култура Зоран Љутков, вработените во Македонската филхармонија повикаа да не се повторува, како што рекоа, погубната практика на кадровски грешки при назначувањето нов директор на установата.