Европската унија од петок воведува санкции за белорускиот претседател Александар Лукашенко и други 14 официјални лица поради репресијата врз демонстрантите по оспорените претседателски избори во земјата, пренесe агенцијата ДПА повикувајќи се на дипломатски извори.
Претставниците на земјите-членки одлуката ја донеса денеска, а се очекува до петок сите 27-те земји да ја завршат целата постапка.
Белорускиот лидер првично беше поштеден од вклучување на црната листа на ЕУ за замрзнување на имотот и забрани за патувања што минатиот месец им беа воведени на 40 лица, поради жестоките акции против демонстрантите.
Во Минск и другите поголеми градови речиси секој викенд во изминатите три месеци се одржуваа масовни протести против Лукашенко, што почнаа по претседателските избори за кои демонстрантите тврдат дека се наместени.
ЕУ ги осуди изборите на 9 август како „неслободни и нефер“ и одби да го признае Лукашенко за претседател.
Шефовите на дипломатиите на земјите – членки на ЕУ во октомври се согласија да го додадат Лукашенко на црната листа на Унијата, доколку не се забележи подобрување на ситуацијата во Белорусија.