Георгиевски во интервју за „360 степени“ минатата недела најави дека ќе оди во Софија за да пренесе порака дека вето за Северна Македонија е контрапродуктивно
Поранешниот премиер и лидер на ВМРО-Народна партија, Љубчо Георгиевски се сретна со шефицата на бугарската дипломатија Екатерина Захариева.
„Јас и мојот тим денеска остваривме плодна средба со нашиот пријател од Република Северна Македонија и нејзиниот премиер од 1998 до 2002 година Лубчо Георгиевски“,
напиша Захариева на Фејсбук.
Георгиевски минатата недела во интервју за „360 Степени“ во кое зборуваше за актуелните случувања меѓу двете земји, најави дека ќе оди во Софија за да каже дека вето за Северна Македонија е контрапродуктивно.
Георгиевски смета оти Бугарија нема да постигне ништо ако не и дозволи на државата да ги почне преговорите за членство во Европската Унија. Најави дека во Софија ќе има јавни настапи за да разбие некои тези што во моментов се шират во Бугарија и таа да може правилно да го процени однесувањето на македонското раководство.
Тој додаде дека Софија не ја разбира новата реалност во Македонија со новата власт – што значи македонски претседател или премиер да објави дека Гоце Делчев е заеднички херој и на Македонија и на Бугарија.
Пренесувајќи делови од интервјуто на Георгиевски, бугарската агенција БГНЕС објави дека тој оди во Софија за да помогне во решавањето на тековните спорови меѓу двете земји.
Посетата, како што се вели во веста на бугарската агенција, ќе се реализира откако тој неодамна имал разговор со премиерот Зоран Заев.