По интервјуто на Сашо Мијалков за Плусинфо, ВМРО-Народна партија јавно упати реакција во која му порачува на поранешниот шеф на УБК и екс-висок функционер во ВМРО-ДПМНЕ, да не го вмешува нивниот лидер Љубчо Георгиевски во внатрешните пресметки во ВМРО-ДПМНЕ.
„ВМРО-Народна партија смета дека како посебен и уникатен партиски субјект немаме ништо општо со оваа партиска гарнитура на ДПМНЕ па сходно на тоа препорачуваме Вашите криминални пресметки да си ги вршите внатре во партијата и помеѓу Вас.Особено зачудува фактот што вакви лаги и невистини ги изнесува човекот кој девет години организирал низа криминални активности за кои слушавме во прислушкуваните материјали или таканаречените „бомби“ па сметаме дека и во иднина се што ќе произнесе овој човек со сомнително минато е под знак прашалник, знаејќи како функционирал додека беше дел од власта на Никола Груевски“,
реагира ВМРО-Народна партија.
Мијалков во интервјуто за Плусинфо во кое упатува критика кон Христијан Мицкоски и актуелното раководството на ВМРО-ДПМНЕ го споменува и Љубчо Георгиевски во контекст на лошите изборни резулатите од партиската историја.
„Реалноста гласи дека ова раководство на ВМРО ДПМНЕ го оствари најслабиот резултат во историјата. Од освоените 455.000 гласови на последните парламентарни избори во 2016 година, Христијан Мицкоски падна на 315.000 гласа. Само Љубчо Георгиевски бил полош од него во 2002 година, кога освои 300.000 гласови, а тогаш и тој и Љубе Бошковски беа на црната листа на САД, a позади себе имаа шверц на цигари, нафта,убиства и куп други афери“,
изјави Мијалков во интервјуто за Плусинфо.
На последните избори, партијата на Георгиевски настапи во коалиција со СДСМ и освоие едно пратеничко место. Претставник на ВМРО-Народна во новото Собрание ќе биде Љупчо Балковски.