Кампањата би почнала на 27 септември, а вториот круг ќе се одржи на 31 октомври
И официјално, 17 октомври е одреден како термин за одржување на првиот круг од локалните избори.
Спикерот Талат Џафери објави попладнево дека го потпишал решението за распишување на изборите, така што од овој момент почнуваат да течат роковите за спроведување на изборните дејствија.
ДИК, како што беше најавено денеска, најверојатно ќе се состане уште вечерва, за да го донесе роковникот за спроведување на изборите.
Џафери објави дека во периодот кога ќе почне изборната кампања, Собранието нема да заседава.
„Во текот на кампањата, Собранието нема да одржува комисиски и собраниски седници, за кампањата да не се пресели во собраниската сала во овие двасет дена. Секако, ако има итна потреба, ќе закажам седница“,
рече Џафери, на прес-конференција доцна попладнево.
Тој упати апел до сите учесници на локалните избори да ги почитуваат Уставот, законите и да овозможат фер изборен процес. Исто така, им посака успех на сите кандидати за градоначалници и за советници.
Овие избори, првично, требаше да се одржат во првата половина на октомври, но потоа нивниот термин беше одложен за втората половина на тој месец, со измени на Изборниот законик што беа донесени во договор меѓу Зоран Заев и Христијан Мицкоски, а со цел да се овозможи и одложување на пописот, кој првично треаше да се одржи во април.
Но, и во овој случај ќе има преклопување од неколку дена меѓу попишувањето и изборната кампања. Сепак, првиот законски термин беше единствениот возможен, затоа што, во спротивно, ќе им истечеше мандатот на досегашните градоначалници и советници.
Кампањата за овие избори би почнала на 27 септември, додека пописот ќе трае до крајот на септември.
Вториот круг од изборите би се одржал на 31 октомври, кога би се гласало во општините каде што нема да биде избран градоначалник во првиот круг.
На овие избори ќе се избираат и членови на советите на општините и на градот Скопје, за што изборот е според пропорционален модел и во еден круг.
Иако имаше предлози и гласањето за градоначалници да биде во еден круг, партиите не постигнаа консензус за такви измени до распишувањето на изборите.
Џафери оцени денеска дека не би било политички коректно допрва да се прават измени на Изборниот законик, на веќе почнат изборен процес.
Со распишувањето на изборите, стапуваат на сила и „забраните’ од Изборниот законик и од Законот за спречување корупција, според кои до завршувањето на изборите не се дозволени нови проекти и нови вработувања во државниот и во јавниот сектор…
