Прашана – „дали би било во духот на добрите демократски практики кампањите да не се мешаат“, Силјановска-Давкова вели дека би било логично да е така, но и дека, „за жал, не само кај нас, туку и во светот, повеќе не може да се направи разлика за тоа какви избори се спроведуваат, пред сè, поради феноменот на ’спектакл-демократија’“
Да одржувате два изборни циклуса кога разликата е шест месеци од еден до друг, не само што е скапа работа, туку е и непотребна – вели пратеничката во Собранието и универзитетска професорка во пензија, Гордана Силјановска-Давкова, во интервју за „360 степени“ на МРТ 1, прашана за тоа дали претседателските и парламентарните избори следната година треба да се одржат одвоено или во исто време. Таа смета дека одделни избори би било „непотребно фрлање пари“, а укажува и на ставот на Венецијанската комисија за неодржливост на изборниот праг во вториот круг од претседателските избори, каде што се бара 40 отсто излезеност за изборите да успеат.
„Значи, можно е (изборите да не успеат, н.з.) бидејќи процентот на граѓани кои се неопределени и немаат намера да излегуваат на избори, постојано расте, што зборува за криза на демократијата, за криза на изборниот модалитет. Не треба да се фрлиме во повторување на изборите, тоа е едната причина. Втората е – многу поевтино е, поодговорно и подомаќински е“,
вели Силјановска-Давкова, чие име повторно се спомнува како можен кандидат на ВМРО-ДПМНЕ за шеф на државата.
На новинарско прашање „дали би било во духот на добрите демократски практики кампањите да не се мешаат, да знаеме што слушаме и дали ги гледаме претседателските кандидати или лидерите на партиите (кандидатите за пратеници)“, Силјановска-Давкова вели дека би било логично да е така, но и дека, „за жал, не само кај нас, туку и во светот, повеќе не може да се направи разлика за тоа какви избори се спроведуваат, пред сè, поради феноменот на ’спектакл-демократија’“.
„Феноменот на ’спектакл-демократија’, ’видеократија’, значи дека воопшто и не е важно на што се фокусирате, туку како тоа ќе го доловите. Инаку, во право сте, би требало така да биде (кампањите да не се мешаат, н.з.), што може да се користи како контрааргумент кога веќе ми рековте за правото на одвојување, бидејќи тогаш многу тешко или уште потешко ќе биде да се одвои што се парламентарни, а што се претседателски“,
рече пратеничката.