За измена на Законот за јавно обвинителство е потребно двотретинско мнозинство во Собранието кое без учество на пратениците на ВМРО-ДПМНЕ не може да се обезбеди. Доколку партијата повторно остане игнорантна на дописите на Лога и не даде поддршка на неговиот предлог, уште еден предлог-закон на ресорниот министер ќе извиси, по оној за амнестија, кој во Собранието не ја доби поддршката ниту од пратениците на СДСМ
Измените на Законот за јавно обвинителство што ги предлага Лога, како што претходно информираа од Правда, се однесуваат на воспоставување надзор врз функционалноста на информатичкиот систем за управување со движењето на предметите на јавните обвинителства. Ваквиот предлог се толкува како обид за воведување своевиден автоматизиран систем за распределба на предметите во Јавното обвинителство, како што е АКМИС во судовите, што според државниот јавен обвинител Љубомир Јовески е неизводливо
Министерот за правда Кренар Лога вчера испратил писмени дописи до опозициската ВМРО-ДПМНЕ со кои бара и очекува партијата да се вклучи во работната група за подготовка на измените на Законот за јавно обвинителство.
Дописите, за кои Лога информираше преку објава на својот фејсбук-профил, а во меѓувреме за потегот стигна и соопштение од Министерството за правда, се адресирани до лидерот на ВМРО-ДПМНЕ, Христијан Мицкоски, и до координаторот на пратеничката група на партијата во Собранието, Никола Мицевски.
Во нив тој ги информирал за содржината и резултатите на координативниот состанок што во средата се одржа во Министерството за правда, а на кој во присуство на претставници на повеќе надлежни институции, политички партии и на невладиниот сектор беа отворени и дискутирани аспекти регулирани со Законот за јавно обвинителство.
На состанокот, иако поканет, како што информираат од Правда еден ден подоцна, не присуствувал координаторот на пратеничката група на ВМРО-ДПМНЕ.
„Следејќи ја и досегашната практика за обезбедување вклученост и на политичката партија ВМРО-ДПМНЕ во сите постапки за донесување на законите кои се во надлежност на Министерството за правда, воедно и преку доставување на работните верзии на законите кои се во постапка на подготовка, во писмениот допис информираше за резултатите од одржаниот состанок имајќи предвид дека координаторот на политичката партија ВМРО-ДПМНЕ и покрај упатената покана не присуствуваше на состанокот“,
се наведува во соопштението на Правда.
Покрај учество, Лога во дописот на опозициската партија ѝ го нуди претседавањето со работната група за измени на Законот за јавно обвинителство.
„Дополнително со доставениот допис на политичката партија ВМРО-ДПМНЕ ѝ се упати можност да даде свој придонес со тоа што ќе ја предводи работата на работната група задолжена за изготвување на измените и дополнувањата на законот за јавното обвинителство преку предлагање на претседател на работна група“,
пишува во соопштението.
Иако досега од партијата не стигнал повратен одговор, министерот за правда изразува уверување дека поканата ќе биде прифатена и ВМРО-ДПМНЕ ќе предложи претседател на работната група.
Инаку, Лога во објавата на Фејсбук го сподели и дописот испратен до партијата на 12 јули со работните верзии на повеќе предлог-закони, меѓу кои и оние за помилување, Кривичниот законик, за јавно обвинителство, за народен правобранител и Законот за заштита на личните податоци.
„И покрај фактот што до министерството за правда сè уште не е доставен никаков писмен одговор, забелешки или предлози на работните верзии на законите во надлежност на министерството за правда кои беа доставени и примени од страна на политичката партија ВМРО-ДПМНЕ на 12.07.2023 година изразуваме уверување дека од нивна страна ќе биде прифатена упатената покана и во оваа насока ќе биде доставен предлог за претседател на работната група која ќе биде формирана во рамки на Министерството за правда“,
велат од кабинетот на министерот за правда.
Измените на Законот за јавно обвинителство што ги предлага Лога, како што претходно информираа од Правда, се однесуваат на воспоставување надзор врз функционалноста на информатичкиот систем за управување со движењето на предметите на јавните обвинителства.
Ваквиот предлог се толкува како обид за воведување своевиден автоматизиран систем за распределба на предметите во Јавното обвинителство, како што е АКМИС во судовите.
Според Лога, предлог-законското решение е во насока на подобрување на ефикасноста и ефективноста на Јавното обвинителство бидејќи актуелниот информатички систем за движење на предметите има недостатоци и не ги дава очекуваните резултати.
Надзорот врз функционалноста на системот за движењето на предметите, што се предлага, треба да придонесе за следење на состојбите во јавните обвинителства, од екипираноста со човечки ресурси до просторните и технички услови, велат од Правда, а ќе го врши комисија чија улога ќе биде само во делот на функционалноста на системот и распределбата на предметите, но ќе нема увид во самите предмети.
Од друга страна, пак, ставот кој на средбата го изнел државниот јавен обвинител Љубомир Јовески бил дека поради специфичната истражувачка улога на јавниот обвинител при обезбедување на доказите во предистражната и истражната постапка во јавните обвинителства, не би можело да се воведе систем идентичен на судскиот АКМИС.
Инаку, за измена на Законот за јавно обвинителство е потребно двотретинско мнозинство во Собранието кое без учество на пратениците на ВМРО-ДПМНЕ не може да се обезбеди. Доколку партијата повторно остане игнорантна на дописите на Лога и не даде поддршка на неговиот предлог, уште еден предлог-закон на ресорниот министер ќе извиси, по оној за амнестија, кој во Собранието не ја доби поддршката ниту од пратениците на СДСМ.