Крајно време е да се донесе одлуката за започнување на пристапните преговори со Северна Македонија. Новата методологија го поедноставува и го прави процесот потранспарентен, не покомплексен. Граѓаните на земјите кандидати како и граѓаните на ЕУ, треба да го почувствуваат благодетот од проширувањето побрзо и поконкретно и мислам дека новата методологија успеа да го стори тоа, вели во интервју за МИА Дачијан Чолош, лидер на политичката група Обнова на Европа во Европскиот Парламент.
Оваа партија брои 98 членови во Европскиот парламент и е трета по големина парламентарна група. Поддржува проширување и зсилен ангажман со земјите од Западен Балкан и нивната перспектива во рамките на ЕУ. Во Европската комисија е застапена со шест еврокомесари.
Европската комисија (ЕК) ја презентираше новата предлог методологија. Дали сметате дека таа ќе го усложни процесот на преговори со внесувањето повеќе условености со оглед дека дел од експертите предупредуваат дека процесот се усложнува и политички и технички?
Групата Renew Europe (Обнови ја Европа) беше во првите редови во размислувањето за ревидирање на методологијата на преговорите за пристапување во ЕУ. Целта беше да се добие поголем политички пристап. Сакавме преговорите да престанат да бидат само прилагодување кон законодавството на ЕУ. Преговорите е потребно да бидат отворени кон граѓаните и граѓанското општество. Покрај тоа, граѓаните на земјите кандидати како и граѓаните на ЕУ, треба да го почувствуваат благодетот од проширувањето побрзо и поконкретно. И мислам дека новата методологија успеа да го стори тоа и тоа го поедноставува и го прави процесот потранспарентен, не покомплексен. На пример, и ова е важна предност на новата методологија, земјите кандидати на ЕУ ќе имаат можности да пристапат во областите на политиката на ЕУ дури и пред официјалниот датум за влез во ЕУ. Ве уверам дека Европскиот парламент, а особено мојата група Обнова на Европа, ќе посветиме големо внимание на тоа како Комисијата всушност ќе ја спроведе методологијата штом ќе биде усвоена.
Усвојување на новата методологија за пристапување беше услов од Франција за продолжување со процесот на проширување. Дебатата во ЕУ е во тек за документот што го предложи ЕК и треба да се усвои на самитот на ЕУ на 26 март. Дали може да се очекува нашата земја да добие датум за преговори на самитот во март со оглед дека треба едногласно да се донесе од сите 27 земји членки?
Новата методологија има предност да одговори на загриженоста која претходно беше изразена од земјите-членки, така што сум убеден дека ќе ја добие потребната поддршка. Во наредните недели, Европскиот парламент ќе расправа и за предлогот на Европската комисија.
Македонскиот Парламент пред распуштањето го усвои Законот за јавно обвинителство што од Брисел беше подигнат речиси на ниво на формален услов за отпочнување на преговорите. Ќе има ли тоа влијание на евентуален позитивен извештај за земјава што ЕК треба да го објави на 4 март и дали Северна Македонија со позитивен извештај може да очекува да добие датум на самитот на ЕУ на 26 март?
Северна Македонија направи многу важен напредок во последните месеци, вклучувајќи го тука и законот за јавни обвинители кој неодамна беше донесен. Сметам дека Северна Македонија е подготвена за почеток на преговори за членство. Се надевам и повикувам на договор во Европскиот совет во наредните недели.
Пред земјата се предвремени парламентарни избори закажани за 12 април кои уследија по Октомврискиот самит на ЕУ на кој и покрај ветувањата на Унијата не беше донесена одлука за старт на преговори. Дел од аналитичарите сметаат дека ако датумот се донесе на 26 март, Брисел ќе влијае на изборите. Каков е вашиот став?
Европскиот совет веќе предолго го одложува донесувањето на одлуката за започнување на пристапните преговори со Северна Македонија. Мислам дека е крајно време да се донесе оваа одлука. Во поглед на изборите, неопходно е тие да се спроведат во согласност со европските стандарди, да бидат слободни и фер. Претстојната кампања треба да биде искористена како можност за политичките партии да ги искажат своите конкурентски визии за тоа како да се реформира земјата откако ќе се отворат преговорите, што ќе се случи наскоро. Отворањето пристапни преговори е само почетна точка. Она што е важно е дека реформите и подобрувањата не се прават за ЕУ, туку се преземаат со цел да се подобри животот на македонските граѓани во нивната земја.
Дали постои можност за евентуално одвојување на Северна Македонија и Албанија овој пат, ако ние добиеме позитивен, а Тирана добие помалку позитивен извештај од ЕК следниот месец. Дали Европскиот совет овој пат би ги раздвоил земјите ако се повтори истото сценарио?
Не можам да зборувам во името на Европскиот совет, но можам да ве уверам дека мнозинството од групата Обнова на Европа во Европскиот парламент го поддржува отворањето на пристапни преговори и со Северна Македонија и со Албанија.