Министерството за внатрешни работи најави дека од следната недела ќе има можност личните карти и возачките дозволи да бидат доставувани од страна на полициски службеници до домашните адреси на граѓаните.
Ова го соопшти министерот за внатрешни работи Наќе Чулев и ќе биде во насока на намалување на гужвата во одделот за управни работи при МВР.
„Од понеделник ќе го смениме правилникот на Министерството за внатрешни работи со што во неопходни ситуации ќе се остави можност, личните карти и возачките дозволи да се доставуваат на домашни адреси. Таква можност не постои за пасошите, бидејќи тие мора да се подигнат со отпечаток од прст“,
рече Чулев.
Кабините за сликање за лични документи се мали, често се создава гужва и нема простор да се одржува препорачаното растојание од 1,5 метри. Дополнителен ризик се и уредите на кои граѓаните оставаат отпечатоци од прст. На новинарско прашање како ќе се надмине овој проблем, Чулев одговори дека веќе се издадени конкретни упатства за работа во овој оддел.
„На координативното тело во рамките на Министерството за внатрешни работи веќе издадовме конкретни упатства за Одделот за управни работи да се придржуваат до правилата и соодветното растојание кога граѓаните поднесуваат документи и извршуваат технички процедури во издавањето и сликање за лични документи. Дадени се конкретни насоки за дезинфекција на уредите каде што се оставаат отпечатоци, односно да се дезинфицираат после секое оставање на отпечаток од прст“,
рече Чулев.