Тетовчанецот и активист за правата на ЛГБТИ популацијата, Беким Асани, во детали го опиша вчерашниот инцидент во Сарај, кога тој и уште неколку активисти од Албанија и од Босна и Херцеговина биле нападнати од поголема група.
Инцидентот се случи околу 16 часот, откако Асани и пријателите заминале на кањонот „Матка“ по завршувањето на „Парадата на гордоста“. Во своето сведоштвото објавено на Фејсбук, Асани објаснува дека причина за нападот не била парадата, бидејќи ниту тој ниту лицата со кои што бил, не носеле обележја на ЛГБТИ заедницата.
„Што се случи вчера… Во група од 15 до 20 души еден рече „дали е тој педерот од Тетово”? Откако и некои му потврдија, почна да ни префрлуваат, при што ние заминавме, но 5 од нив не следеа и ми се нафрлаа мене. Едниот ме плукна. Цело време викаа ќе те убиеме, мртов си, а на другарките им викаа вас ќе ве силуваме. Ова траеше едно 300 метри, додека не се качивме во такси. Ние со две такси, една кола не следеше напред една странично. Таа напред два пати ни го пресече патот, па таксистот даде гас повеќе. Но, во Сарај имаше гужва. По трет пат ни го пресекоа патот. Едниот излезе од кола, дојде, ја отвори врата од таксито и ми ја искина маичката (маичката не беше од скопје прајд). Ми ги искина и двете гумени алки. Пак се врати и ми удри бокс. За тоа време други се собираа и ни ја опколија колата викајќи педери мрш од тука, ќе умрете. Имавме многу среќа затоа што во кафулете од спротива имало тројца полицајци кои притрчаа. Но и тие беа нападнати од тој што ми удри бокс и од неговиот другар. Фалеа секунди да завршиме многу полошо. Никој од нас немаше ништо, никакви ЛГБТИ обележјa. Oни ме препозна менe. Сите сме шокирани. Се беше како на филм, ова нема да го заборавиме цел живот“,
пишува Асани на својот Фејсбук профил
Министерството за внатрешни работи уште синоќа го потврди нападот и извести дека во врска со случајот е приведено едно лице.