Незаконското делување, како што соопштија од Комисијата за заштита на конкуренцијата, било откриено при ненајавена контрола во четири трговски ланци и во една од стопанските комори во која тие биле здружени
Комисијата за заштита на конкренцијата вечерва соопшти дека повела прекршочна постапка против неколку ланци маркети кои се договарале за цени на производи.
Имено, како што се наведува во соопштението на Комисијата, трговските ланци се договориле да не набавуваат стоки од добавувачи кои ќе достават нови ценовници.
„Контролираните субјекти спротивно на Законот за заштита на конкуренцијата донеле забранета одлука односно се договориле дека ќе делуваат усогласено и нема да набавуваат стоки од добавувачи кои ќе достават нови ценовници за нивните производи, поради што е поведена прекршочна постапка“,
се вели во соопштението на Комисијата за заштита на конкуренцијата, објавено на нејзината фејсбук-страница.
Незаконското делување било откриено при ненајавена контрола во четири трговски ланци и во една од стопанските комори во која тие биле здружени.
„Увидот е извршен поради постоење на сомневање дека неколку ланци на маркети кои вршат трговија на мало со прехранбени и непрехранбени производи го прекршиле член 7 од Законот за заштита на конкуренцијата, кој забранува картели односно забранува договори и усогласено однесување на две или повеќе претпријатија, а се со цел нарушување на конкуренцијата“,
се вели во соопштението.
Како што информираат од Комисијата, при увидот во службената документација и во средствата за електронска комуникација во службените простории на фирмите биле пронајдени докази за незаконската одлука која ја донеле и која, како што се наведува, јавно ја објавиле преку средствата за јавно информирање.
Од Комисијата велат дека интензивно вршат контроли кај повеќе правни субјекти кои имаат свој удел во синџирот на снабдување со земјоделски и прехранбени производи и дека преземат најригорозни мерки и санкции на секое нарушување на конкуренцијата на пазарот.
Инаку, од денеска дел од основните прехранбени производи во маркетите треба да се продаваат со пониски цени, откако Владата донесе мерки за ограничување на бруто-профитната маржа и за замрзнување на цените.
Со ограничена бруто-профитна маржа од пет отсто од денеска треба да се продаваат млекото, лебот, брашното тип 400 и 500, јајцата, маслото за јадење, јогуртот и киселото млеко. Месото и преработките од месо, шеќерот, млечните производи, маргаринот, путерот, конзервираниот зеленчук и овошје, гравот, оризот и тестенините ќе имаат ограничена маржа од 10 отсто, а на 15 отсто се ограничува на средствата за хигиена, свежото овошје и зеленчукот, детергентите, бебешката храна, пелените, сапунот, тоалетната хартија. Како највисока цена што треба да се земе за ограничувањата е онаа што важела на 1 февруари годинава.
Со одлуката треба да бидат опфатени 102 групи производи или на над 1 000 прехранбени и непрехранбени производи. Трговците се задолжени на рафтовите да имаат најмалку 70 отсто од овие 102 групи на производи.
Очекувањата на Владата се дека со оваа одлука ќе има намалување на цените за околу 10 отсто.