Заканите кон судиите и обвинителите, според портпаролката на СДСМ, сериозно ја загрозуваат независноста на правосудниот систем, и тоа, како што вели, носи долгорочни последици и за правниот систем и за демократијата
Притисокот врз Судскиот совет, за кој вчера обвини експретседателката на ова тело, Весна Дамева во образложението на нејзината неотповиклива оставка, според опозицискиот СДСМ, е дел широката стратегија на премиерот Христијан Мицкоски и владејачката ВМРО-ДПМНЕ за целосна партизација на институциите и повторно заробување на судството.
Овој процес, кој го спроведуваат партијата на власта и Мицкоски, портпаролката на СДСМ, Богданка Кузевска, денеска одговарајќи на новинарско прашање, оцени дека е побрутален дури и од оној од времето на експремиерот и поранешен лидер на ВМРО-ДПМНЕ, а сега бегалец во Унгарија, Никола Груевски.
„Власта на ДПМНЕ и на Мицкоски наместо да спроведува реформи сака да го стави правосудниот систем под нивна контрола и да го користи како алатка за партиски цели.
Притисокот што го гледаме врз Судскиот совет е дел од широката стратегија на Мицкоски и ДПМНЕ за целосна партизација на институциите и повторно заробување на судството, процес којшто е дури побрутален од времето на режимот на Никола Груевски“,
изјави Кузевска.
Заканите кон судиите и обвинителите, додаде таа, сериозно ја загрозуваат независноста на правосудниот систем, и тоа, како што вели, носи долгорочни последици и за правниот систем и за демократијата.
Кузевска посочи дека Социјалдемократскиот сојуз на Македонија поддржува реформи во правосудството, но такви кои ќе бидат по европски стандарди, а не по партиски агенди на власта.
„СДСМ дефинитивно стои зад потребата од реформи во правосудството со вклучување на странски експерти и со меѓународен мониторинг. Овие реформи треба да бидат по европските стандарди, а е од партиски агенди на власта“,
изјави Кузеска одговарајќи на новинарско прашање на денешната прес-конференција, посветена на темата за партизација на институциите.
Членката на Судскиот совет Весна Дамева вчера поднесе неотповиклива оставка од функцијата претседателка на ова тело наведувајќи дека во изминатиот период, особено во последните месеци, се соочила со притисоци код страна на одредени политичари, кои во обидите да го нарушат нејзиниот интегритет ја користеле и собраниска говорница.
Во таа насока, таа директно ги посочи премиерот Христијан Мицкоски и пратеникот од редовите на ВМРО-ДПМНЕ и член на Извршниот комитет на ВМРО-ДПМНЕ, Антонијо Милошоски.
Инаку, оставката на Дамева дојде откако премиерот Мицкоски во средата најави робусна борба против корумпирани судии и обвинители, со кои, како што рече, ако треба ќе се справат и на поинаков начин. Два дена подоцна, премиерот, исто така, одговарајќи на новинарски прашања рече дека со робусната акција почнуваат од понеделник, односно од почетокот на оваа недела.
„Доволно беше чекање. Чекавме, дадовме шанса, доволно беше. Очигледно е дека прежестоки се нападите наеднаш на дијареја, грчеви во цревата, главоболка, температура, анксиозност итн. кога треба да се потпише последниот указ за да се спроведе правдата, кај поедини обвинители за жал“,
рече Мицкоски во петокот.
Во меѓувреме, се пожестоки се критиките од ВМРО-ДПМНЕ кон државниот јавен обвинител, Љупчо Коцевски, за кого од владејачката партија велат дека шест месеци нема покренато ниту едно обвинение и оти е целосно одговорен за непостапувањето и неработењето на обвинителите под него.
Во врска со критиките на премиерот дека обвинители се разболувале во моменти кога требало да ја спроведат правдата, Коцевски во петокот одговори дека имало само еден случај во кој обвинител не отишол на закажан состанок бидејќи имал вирус, но по неколку дена одржал неколку состаноци со надлежните служби од полицијата за координација по одредени предмети.
Денеска, портпаролката на Владата, Марија Митева прашана дали вчерашната неотповиклива оставка на, сега веќе поранешната претседателка на Судскиот совет, Весна Дамева и сè пожестоките критиките од страна на владејачката ВМРО-ДПМНЕ кон државниот јавен обвинител, се дел од таа робусна акција и дали тоа може да ѝ донесе негативни поени на земјава, рече дека како не ценат дека станува збор за притисок врз судиите и обвинителите, а негативните поени како држава „доаѓаа од непостапувањето на правосудството во целина и од огромниот број на скандали коишто се случуваа таму“.