Кумановскиот кризен штаб за справување со ширењето на короната предводен од градоначалникот Максим Димитриевски изрази незадоволство од дејствувањето на МВР во Куманово.
Според нив, полицајците не преземале доволни превентивни и репресивни мерки за опоменување на поголеми групи во одредени делови на градот, непочитување на социјална дистанца, неносење на заштитна маска.
Тие бараат од МВР итно да дејствува за да се спречи евентуално зголемување на нови случаи, како последица на непочитување и неодговорно однесување на граѓаните.
Од друга страна, градоначалникот на Куманово бара од Владата подготовка на Ковид болница за да се зголемат капацитетите за евентуални пикови на болеста.
„Бараме од Владата во соработка со Општина Куманово да пристапи кон зголемување на капацитети на болницата за третирање на пациенти со COVID -19 на простор утврден од локалните власти и ресорното министерство за се да биде подготвено за евентуалните пикови во наредниот период на ковид кризата“, се вели во еден од заклучоците на кумановскиот кризен штаб.
Освен ова тие бараат Владата и надлежните да направат увид во делот на организациска поставеност во банките и други приватни јавни институции со можност за воведување на нумерациски систем за да се избегнат постојаните метежи на јавно прометните површини пред овие услужни установи.
„Бараме од Владата да се засили и надзорот на северната граница за да се спречи движењето на бегалците, нивно сместување во ТПЦ Табановце и влијанието на населението во однос на здраствената состојба на истото, како и почитување на уредбата на Владата донесена на 26.03.2020 година“, велат од таму.
Во исто време, тие упатуваат и апел до Кумановци, да ги почитуваат мерките и да не веруваат на лажни вести кои што ја релативизираат болеста.