Бугарскиот европратеник и известувач на Европскиот парламент за земјава Илхан Ќучик за софиската телевизија БТВ вели дека доколку лидерот на ВМРО-ДПМНЕ, Христијан Мицкоски, својата кампања ја води со ставови против Бугарија и се противи на вклучувањето на Бугарите во Уставот на земјата, тоа ќе го блокира патот на Република Северна Македонија кон ЕУ.
„Процесот на преговори меѓу ЕУ и Република Северна Македонија се уште не е започнат, бидејќи се чека да заврши скринингот, кој ќе потрае извесно време. Од бугарското искуство знаеме дека тоа трае од година и половина до две години и мора да се дадат оценките за тој скрининг“,
вели Ќучук
Тој нагласува дека францускиот предлог за деблокирање на евроинтеграцијата на земјава претставува предлог на Европската Унија, бидејќи е прифатен со консензус од сите членки на ЕУ, ја доби и потребната политичка поддршка, како во бугарското така и во македонското Собрание.
Ќучук додава дека согласно францускиот предлог, преговорите на земјава по кластери и поглавја треба да почне по завршувањето на процесот на скрининг, но и по вклучувањето на Бугарите во Преамбулата на Уставот во редот на другите делови од народи што живеат во државата.
„За жал, во македонскиот парламент францускиот предлог беше прифатен само со гласовите на владејачките и дел од опозициските партии. Најголемата опозициска партија категорично се спротивстави на овој предлог и најави дека нема да гласа за измените на Уставот и вклучувањето на Бугарите во Уставот. Ова, би рекол, е многу тажен развој на настаните“,
додаде Ќучук.