Вработен во Општина Бутел, утрово во непосредна близина на општинската зграда, бил прободен со нож, по што е пренесен во Ургентниот центар во Скопје.
Според информациите на „360 степени“, станува збор за Ацо Тасевски, познат како Ацо Комета, кој работи како инспектор во Општината.
Ваков инцидент регистрирало и Министерството за внатрешни работи (МВР) од каде што ги соопштуваат само иницијалите на инволвираните.
„Во 7:52 часот во СВР Скопје било пријавено дека во непосредна близина на Општина Бутел, вработен во општината А.Т. (53) од Скопје е прободен со остар предмет од страна на неговиот брат Љ. Т. (52) од Скопје. Полициски службеници излегле на местото на настанот и Љ.Т. е приведен, а А.Т. со возило на Итната медицинска помош е пренесен во Ургентен центар-Скопје“,
велат од МВР.
Полицијата работи на расчистување на случајот и засега нема информации за причините за нападот, а според нашите информации, сè уште се земаат изјави од дел од вработените во Општината и очевидци.
Извори од локалната самоуправа, пак, тврдат дека инцидентот не е поврзан со работата на Општината, односно дека станувало збор за приватни недоразбирања помеѓу двајцата браќа.