Од Општината соопштуваат дека полицијата поставува пунктови на влезовите од градот, а ќе воведе и патроли по населените места
Крушевската конфекција „Фалко” од утре нема да работи, а вработените ќе бидат во самоизолација, откако во овој град денеска беа дијагностицирани првите два случаи на коронавирус.
Инспекциските служби и Центарот за јавно здравје од Прилеп ќе испитуваат кој бил во контакт со заболените.
По регистрирањето на првите двајца заболени, градоначалникот на Крушево, Томе Христоски, пренесува МИА, упатува апел за смиреност и ги уверува граѓаните дека се преземаат сите неопходни мерки.
Од Општината соопштуваат дека полицијата поставува пунктови на влезовите од градот и воведува патроли по населените места. Ќе се преземаат соодветни мерки при поголеми собирања и непочитување на полицискиот час.
Градските власти укажуваат до сите што имаат симптоми на покачена температура, кашлица, треска… веднаш да се јават кај матичните лекари, но и тие кои биле во контакт со потенцијално заразени или во контакт со лица кои дошле од странство. Да се избегнува самолекување, а може да се контактира и Центарот за јавно здравје Прилеп.
Според градоначаникот Христоски, Општината ги презема сите неопходни мерки за превенција: дезинфекција, набавка на доволен број заштитни визири, маски и ракавиц, како и скафандери со кои се заштитуваат службите кои директно се изложени на ризик од инфицирање. Општината соопштува дека сите волонтери може да се пријават на повикот на Црвениот крст од Крушево за помош на стари и изнемоштени лица.