Управата за финансиска полиција денеска соопшти дека, поради постоење основи на сомневање за сторено кривично дело даночно затајување, до Основно јавно обвинителство Скопје поднела кривична пријава против Лила Стојановска, сведок во случајот „Рекет“.
Во соопштението тие наведуваат дека Л.С., во својство на физичко лице, во периодот од 21.6.2017 година до 7.7.2017 година, на личната банкарска сметка, во три наврати примила парични средства во вкупен износ од 16 095 600 денари, по основ на склучен договор за изготвување проект за интернационална асоцијација за заштита на човековите права со Друштвото „Изградба инженеринг ДАН-МАК“ Скопје и лицата Е.Н. и Д.Н.
Парите, како што стои во соопштението, како остварен приход Л.С. ги подигнала во целост и во готово за себе лично, при што без да ги пријави во Годишната даночна пријава за 2017 година до Управата за јавни приходи, не пресметала и не уплатила персонален данок на доход во висина од 1 788 398 денари, за кој го оштетила Буџетот на Република Северна Македонија.
Управата за финансиска полиција постапила по овој случај откако претходно до неа е доставена пријава од друштвото „Изградба инженеринг ДАН-МАК“ и лицата Е.Н. и Д.Н.
Деновиве во јавноста косопственичка на градежната компанија ДАН-МАК, Ена Норнилд, тврдеше дека на водителката Лила Стојановска ѝ дала пари за изградба на пензионерски домови кои потоа не ѝ биле вратени, што адвокатот на водителката го негираше со тврдење дека долгот бил вратен.
Стојановска, која важеше за блиска пријателка на првоосомничениот во „Рекет“, Бојан Јовановски, на крајот од јануари се појави на суд како сведок во тој случај.
Таа тогаш одговараше на прашања за пријателството со Боки 13, но и за донацијата од 25.000 евра која му ја дала кога се отворала 1ТВ.
Обвинителката Гордана Смаќоска тогаш ја праша Стојановска зошто парите прво биле префрлени како позајмица на нејзината сметка од „БМЈ медиа груп“, а потоа таа ги дала како позајмица на „БМЈ медиа груп“, што Стојановска го демантираше.