Неделен извештај на ИЈЗ
За една недела има незначително зголемување на бројот на нови случаи со коронавирус, но има зголемување на бројот на смртните случаи и на бројот на тестирањата, покажува неделната анализа на Институтот за јавно здравје за состојбата со ковид-19 во земјава.
Од 9 до 15 ноември се регистрирани 7 355 нови позитивни случаи од 35 града во државата, што е незначително зголемување во однос на минатата недела (2-8 ноември), кога беа регистрирани 7 280 нови случаи.
Најголем дел од регистрираните случаи и натаму се од Скопје (n=3.305; 44,9%), но процентот на позитивни од тестираните лица изнесува 35% или намалување за 2% во однос на минатата недела.
Возраст
Новорегистрираните заболени лица се од сите возрасни групи, но најзастапена е возрасната група над 60 (n=1646, 22,4%), потоа лицата од 30 до 39 години (n=1496; 20,3%), 40-49 (n=1435; 19,5%), 50-59 (n=1410; 19,2%) и 20-29 (n=961; 13,1%), додека најмал број кај децата од 0 до 9 (n=120; 1,6%) и 10-19 години (n=287; 3,9%).
Во однос на полот, повеќето од заболените се мажи 3 731 (50,7%), во споредба со 3 624 (49,3%) жени.
Смртност
Но она што загрижува е смртноста кај пациентите со ковид, чиј број оваа недела изнесува 172 смртни случаи од 23 града, зголемување од 35,4% во однос на минатата недела.
Останува забелешката дека најголем број од починатите – 135 лица биле над 60 години, 26 лица на возраст од 50 до 59 години, 9 смртни случаи се пријавени од возрасната група 40-49 години и два случаи во возрасната група 30-39 години.
Пораст има и кај бројот на тестирани на неделно ниво. Оваа недела тој број е 20 980 материјали во лабораториите во кои се спроведува молекуларно тестирање и е зголемување од 6,4% во однос на минатата недела.
Деталниот извештај на Институтот за јавно здравје за состојбата со ковид-19 за периодот од 9 до 15.11.2020 г. како и кумулативната состојба со ковид-19 на веб-страницата на ИЈЗ http://iph.mk/.