Минатата година, кога почна и пандемијата, во земјава починале 25 775 лица, од кои 10, 9 отсо го изгубиле животот како последица на коронавирусот
Зголемен морталитет за 26 проценти регистрира Државниот завод за статистика (ДЗС) во 2020 година, во однос на претходната 2019 година. Минатата година во земјава починале 25 775 лица, додека во 2019 година бројката на починати е 20 466 лица.
Според податоците на ДЗС, поглема е бројката на починати од машки пол – 13 914 или 54 проценти. Бројката на починати доенчиња е 108 и нивното учество во вкупниот број на починати изнесува 0.4 % на 100 починати лица.
Просечната возраст кај починатите од машки пол изнесува 71,6 години, односно 75,3 години кај лицата од женски пол или за 3,7 години повисока просечна возраст се бележи кај жените.
Според месецот на смртта, најголем број случаи се во месец ноември (3 847), кога беше и пикот на вториот бран на пандемијата на ковид-19, која почна во почетокот на 2020 година.
Според податоците на ДЗС, ковид-19 е трета по ред причина за смрт во 2020 година. Како и во минатите години, најголемо учество имаат починати од болести на циркулаторниот систем, и тоа во 41.6 % случаите. Следна причина се неоплазмите со 15.2 %, а потоа следат починатите лица како последица на ковид-19 – со 10.9 отсто. Со 5.8 % се застапени случаите кај кои причина за смрт се болестите на респираторниот систем, додека починатите кај кои причина за смрт се ендокрините, нутритивните и метаболичните болести се застапени со 5.3 % , додека во 3.7 % од случаите причина за смрт се болести на нервниот систем. Другите причини за смрт се со помала застапеност.
