Според најновите податоци, во светот досега се регистрирани 199 409 луѓе заразени со новиот коронавирус. Од нив починати се 7 997, а оздравеле 82 812 луѓе.
Кина, земјата каде што првпат се појави вирусот пред околу три месеци, во последните 24 часа забележа само 12 нови случаи на заразени, од кои во Вухан имало само еден. Сите биле вратени од странство. Кинеските власти инсистираат сите што доаѓаат од странство задолжително да минат 14 дена во карантин, но земјата засега не ги затвори границите. Министерството за здравство соопшти дека во последниот ден во земјата починале 11 лица.
Во Италија, пак, во последните 24 часа починале 345 луѓе, а 3 526 биле новозаразени со коронавирус. Тоа е повеќе од вчерашната бројка кога имаше 3 233 новозаразени.
Вкупниот број заразени во Италија изнесува 31 506.
Во Шпанија досега се регистрирани 11 409 заразени со ковид-19.
Белгиските здравствени власти информираат дека се потврдени уште 243 нови случаи на коронавирус во земјата, со што вкупниот број сега е 1 498 потврдени случаи. Од нив, 496 се хоспитализирани, 100 се на интензивна нега, 66 на респиратори, а 31 лице се пуштени од болница. Починати има четиринаесет, најмладиот починат пациент имал 59 години.
Случаите растат вртоглаво во Белгија, поради што владата се одлучи за речиси целосен карантин и од денеска напладне, отворени остануваат само аптеките и продавниците за храна.
Нови 140 случаи на инфицирани со вирусот се пријавени во здравствените установи низ Австрија, а со што бројот на вкупно заразени сега изнесува 1 471. Ноќеска во покраината Горна Австрија била поднесена првата пријава за непочитување на владините мерки за ограничување на движењето, бидејќи едно 30-годишно лице било затекнато на железничката станица во градот Линц, кое тргнало во посета на пријател затоа што веќе не можело да седи дома во изолација. Казната за овој прекршок изнесувала 3 500 евра.
Лидерите на земјите членки на Европската Унија го поддржаа предлогот на Европската комисија за воведување забрана за влез во зоните на ЕУ и Шенген, со цел да се спречи ширењето на коронавирусот. Овие мерки ќе се применуваат на т.н. државјани на трети земји за период од 30 дена. Рестриктивните мерки ќе ги исклучат граѓаните на ЕУ, постојаните жители на земјите од ЕУ, дипломати и медицински персонал, како и експерти кои помагаат да запре коронавирусот.
Претседателката на Европска комисија Урсула фон дер Лајен изјави дека политичарите го потцениле степенот на опасност од епидемијата на новиот коронавирус.
Во Хрватска од ноќеска се регистрирани 12 нови случаи на заразени, од кои осуммина се лекари, а вкупниот број на заразени сега изнесува 81. Дури 132 лица ги прекршиле прописите за самоизолација.
Во Босна и Херцеговина уапсен е полицаец кој зел мито за да пушти во земјата три лица кои требало да бидат во изолација.
Молдавија го пријави првиот смртен случај од коронавирусот. Досега како заразени се водат 30 лица.
Во последните 24 часа во Тајланд се регистрирани нови 35 случаи на заболени од вирусот, што е најголема бројка во еден ден од почетокот на епидемијата. Вкупниот број на заразени изнесува 212 лица, а досега починало едно лице.
Во Пакистан педесет нови лица се инфицирани со коронавирус во последните 24 часа, со што вкупниот број на заболени во земјата сега изнесува 245, соопшти портпаролот на Министерството за здравство. Премиерот Имран Кан и соопшти на нацијата да се подготви за пандемија, и брзо ширење на вирусот низ земјата во следниот период.
Министерството за здравство на Камбоџа соопшти дека двајца Малезијци се позитивни на тестовите за коронавирус, со што вкупниот број на заразени во земјата сега изнесува 35. Кралската палата соопшти дека од денеска се забрануваат туристички посети на земјата. Владата од претходно ги затвори училиштата, музеите, клубовите, кинатa.
Владата на Колумбија од денеска воведува вонредна состојба и ги затвора сите граници до 30 мај во обид да го спречи ширењето на заразата.