Ковид-19 го одложи Вевчанскиот карневал, кој традиционално се одржува за Стана Нова година. Годинава, како што денеска рече градоначалникот Сашо Јанкоски, тој ќе се одбележи со симболична поворка, без концерти и друга организација.
Откажувањето на фестивалскиот дел, како што рече, е за да се спречи масовно собирање на луѓето, но и нагласи дека василичарските поворки ги организираат двете друштва, Горно и Долно маало.
„Општина Вевчани се откажува од организирање концертите на 12 и 13 јануари за да се спречи масовно собирање поради пандемијата со ковид-19. Но, ниту некогаш се мешала, ниту има право да се меша, а најмалку да ја одлага Свети Василија. Организацијата на поворките со Василичари е на василичарските друштва Горно и Долно мало и тоа е нивно право, но и обврска“,
изјави Јанкоски кој апелираше да се почитуваат мерките за заштита.
Вевчанскиот карневал е со традиција од околу 15 века. Карактеристичен е по тоа што вевчанци преку целата година ги подготвуваат маските, кои го отсликуваат секојдневното живеење, со посебен акцент на политичката сцена, како во земјава, така и во светот.
Покрај карневалското дефиле, изминатите години се организираа концерти со познати музички имиња, изложби и други културни настани, со цел поголема посетеност на настанот.