Зошто не е свикана седницата на Комисијата за деловнички и мандатно-имунитетни прашања, праша пратеникот од ВМРО-ДПМНЕ и воедно го праша премиерот дали смета оти Џафери е закана за националната безбедност поради средбата со претставници на Европскиот муслимански форум минатата година
Дали како премиер и како претседател на Социјалдемократскиот сојуз не мислите дека треба да го повикате, да поразговарате малку со него, да прашате зошто не е свикана седницата на Комисијата за деловнички и мандатно-имунитетни прашања, дали еве сега откога имате јавно признание од Талат Џафери, да се распрашате дали е ова првпат што се случува, дали е континуитет на некои поранешни настани. Дали би побарале од коалициски партнер Талат Џафери јавно да им се извини на службениците? Мислам дека е не во ред од нечие непримерно поведение некој да трпи штета. Вакво прашање до премиерот Димитар Ковачевски упати пратеникот од ВМРО-ДПМНЕ, Драган Ковачки, кој го повика да го осуди однесувањето на Талат Џафери кон собраниските служби што се слушна на телевизиската снимка од 11 мај.
„Доколку не побарате од Минов да свика седница, а од Талат Џафери оставка, ќе покажете дека Етичкиот кодекс е мртов и дека повеќе не важи“,
рече Ковачки на денешната собраниска седница со пратенички прашања.
Премиерот Ковачевски, во однос на барањето за седница на комисијата, одговори дека голем број седници на собраниските тела се откажани поради бојкотот на опозицијата и дека парламентарните седници не ги закажува премиерот.
„Уште првиот пат кога дадов изјава, реков дека не можам да му наредувам на Собранието на кој начин ќе го спроведува Етичкиот кодекс на однесување, туку за тоа постои соодветна комисија. Исто така, не може на пратениците некој од надвор да им ги закажува седниците. Поради бојкотот на опозицијата во Собранието, голем број седници се откажани и голем број законски решенија не се носат. Ако може премиер да се јавува и тогаш веднаш да ги закажуваат седниците, тогаш да воспоставивме таква пракса. Но, не може закажување на некоја седница, а на некоја не, да биде исклучок само затоа што некому тоа му одговара“,
рече Ковачевски.
„Не осудувате и се обидувате да релативизирате. Имате потврда од самиот Талат Џафери и треба да се одважите да го осудите овој чин, а не да поддржувате нецивилизирано однесување“,
рече Ковачки незадоволен од одговорот.
„Денеска сме во континуитет на некое така заробено да речам Собрание, во кое што владее хаос, во кое што не владее демократија, во кое што се погазија сите принципи на демократијата. Континуитет на хаосот кој што е создаден токму од човекот зад мене, поточно од Талат Џафери кој што седи и претседава со седницава. И во тој контекст јас ќе продолжам понатаму односно ќе поставам неколку пратенички прашања кои што се однесуваат на произнесувањето од страна на премиерот односно претседателот на Социјалдемократскиот сојуз, човекот кој што ја предводи Владата на ДУИ“,
рече тој.
Тој потоа го праша премиерот и дали смета дека Талат Џафери е опасност или закана за националната безбедност зашто, како што рече, криел дека на средба со претставници на Европскиот муслимански форум минатата година присуствувал и Чеченецот Абдул Вајед Нијазов, поранешен пратеник во руската Дума, односно дека Џафери се сретнал со лица кои се од безбедносен карактер.
„Како може да не ве интересира со кого се среќава вториот човек на државата и дали некој му наметнал да се среќава со нив“,
рече Ковачки и праша и дали премиерот знае кој иницирал изградба на споменик на Ахмат Кадиров во Тетово.
Ковачевски одговори дека на 8 јули претседателот на Собранието имал средба со делегација на Европскиот муслимански форум во кој биле претставници од различни земји и дека содржината на разговорот на мултилатерално ниво како и секогаш, рече, е објавена во веста на веб-страницата на Собранието.
„Пред одржувањето на средбата, според вообичаената пракса, Собранието добива и позитивно мислење од МНР на Северна Македонија и информација дека делегацијата е примена од страна на домаќинот кој треба да ги прими. Вакви средби на претставници на Европскиот муслимански форум имале и други државници во регионот, а во 2018 г. истиот форум бил гостин и кај претседателот на Република Македонија во тоа време. Кога Европа и светот одржуваат конференции за борба со лажни вести и дезинформации, не е убаво нешто што е објавено и за што постојат записи и што било во минатото да се пласира како сензација која е навистина неточна и има за цел да нанесе штета, прво во Собранието, а и штета на државата“,
истакна Ковачевски.
На прашањето одговори и самиот Џафери кој додаде дека биле известени сите институции и јавноста преку медиумите.
„Така што, вие може да зборувате по однос на ова прашање што сакате“,
рече претседателот на Собранието.