Ковачки во објава на Фејсбук прашува дали приведените припадници на военото разузнавање биле да истражуваат повеќегодишна појава на шверц на акцизна и друга стока од страна на припадниците кои се во мисија на Косово
Пратеникот на ВМРО-ДПМНЕ, Драган Ковачки, реагира на синоќешното интервју на министерката за одбрана Славјанка Петровска за „360 степени“ во кое таа ги демантира неговите наводи дека во Косово биле уапсени оперативци на военото разузнавање
Ковачки ја повика Петровска да одговори на неговите прашања зашто таа, како што вели, е дел од извршната власт и треба да одговара пред пратениците.
„Ако сте сигурна во Вашето тврдење дека станува збор за измислен настан со приведувањето на оперативците, станете и кажете ѝ на македонската јавност зошто криете и дали приведените припадници на военото разузнавање биле да истражуваат повеќегодишна појава на шверц на акцизна и друга стока од страна на припадниците кои се на мисија во Косово? Кој ги селектираше и ги прати тие лица на Косово, Вие или некој друг? Зошто барате да Ви го покажам документот дека двајца оперативци кои биле пратени на Косово и дека биле приведени поради сомнителни активности, кога и сама знаете дека документот е класифициран и јас не би можел да го поседувам бидејќи вашите служби напишале дека сум бил неподобен за безбедноста на државата. Станете и кажете колку време знаете за оваа појава и зошто сте неспособни да ја сузбиете и зошто тие што требало тоа да го сузбијат ги наградивте со девизни плати? Дали затоа што ги злоупотребивте и наместо да се борат со криминалот, вие успешно ги насочивте кон ВМРО-ДПМНЕ?“,
пишува ковачки во објава на својот фејсбук-профил.
Тврдењата на Ковачки за ваков инцидент, министерката за одбрана во гостувањето во емисијата „360 степени“ ги нарече лага.