Ковачевски за оставката на Зеќири: Тоа е акт на политичка одговорност, очекувам независна постапка од судските органи

Оставката следува откако Јавното обвинителство за гонење организиран криминал и корупција донесе наредба за спроведување истражна постапка против двајца хрватски државјани и висок функционер во Владата

Ја почитувам одлуката на Мухамед Зеќири да се повлече од функцијата. Тоа е акт на политичка одговорност. Владата во најскоро време ќе започне постапка за избор на нов генерален секретар, изјави за МИА премиерот Димитар Ковачевски.

Ковачевски истакна и дека очекува целосно транспарентна и независна постапка од Обвинителството.

„Очекувам целосно транспарентна и независна постапка од Обвинителството и судските органи и целосно почитување на пресумцијата на невиност“,

изјави Ковачевски.

Зеќири поднесе оставка од функцијата генерален секретар на Владата

Мухамед Зеќири денеска на својот фејсбук-профил објави дека поднесува неотповиклива оставка од функцијата.

Оставката следува откако Јавното обвинителство за гонење организиран криминал и корупција донесе наредба за спроведување истражна постапка против двајца хрватски државјани и висок функционер во Владата на РСМ во својство на службено лице, осомничен дека сторил кривично дело злоупотреба на службената положба и овластување.

Русковска за „Слободен печат“ за истрагата против Зеќири: Случајот го добивме во втората половина на 2021 година, имаме податок каде се парите

Обвинителката Вилма Русковска денеска изјави дека предметот за истрагата за проневера, која е покрената против генералниот секретар на Владата Мухамед Зеќири и уште двајца хрватски државјани, Обвинителството го добило во втората половина на 2021 година.