Ваква порака вечерва на Фејсбук испрати премиерот Димитар Ковачевски откако спрскиот министер за одбрана Милош Вучевиќ изјави дека признавањето на Косово ќе им се удри од глава на С Македонија и на Црна Гора, по што македонскиот министер за надворешни работи побара појаснување
Вечерва разговаравме со српскиот претседател Александар Вучиќ во Атина. Ме увери дека како преставник на српската држава, тој ги смета македонскиот народ и македонската држава за исклучително пријателски и дека доколку некој македонски граѓанин е навреден од било која порака од српската држава, тој лично ќе се извини.
Ваква порака вечерва на Фејсбук испрати премиерот Димитар Ковачевски откако спрскиот министер за одбрана Милош Вучевиќ изјави дека признавањето на Косово ќе им се удри од глава на С Македонија и на Црна Гора, по што македонскиот министер за надворешни работи побара појаснување.
Имено, Вучевиќ денеска за ТВ Пинк изјави дека Црна Гора и Северна Македонија ја навредиле Србија со признавањето на независноста на Косово и дека тоа претставува мешање во внатрешните работи на една земја.
„Направивте грешка и ќе ви се удри од глава, како што во Украина им се удира во глава на сите кои го промовираа Косово и Метохија како независна држава. Ја отворивте Пандорината кутија. Смешни се вашите бирократски одговори дека Косово е sui generis, дека е посебен случај. Ниту Албин Курти, ниту Тирана не ви веруваат во тоа“,
изјави Вучевиќ.
Тој рече дека постои голема меѓународна поддршка за создавање на Голема Албанија, нагласувајќи дека тоа не е прашање само за Србија, туку и за нејзините соседи.
„Дали нашите пријатели во Северна Македонија спијат мирно? Дали спиете мирно? Сметаат дека се во НАТО пактот и дека си ги решиле проблемите. Ова е мантра и на Црна Гора и на Северна Македонија. Кога станаа членки на таа колективна безбедност, односно НАТО алијансата, мислат дека си ги решиле сите проблеми и дека веќе ништо не може да им се случи. Мора да погледнете она што е во историјата, да ги разберете малку другите околности и да разберете што се случува во нивниот двор. Ние не сакаме да ја водиме нивната политика, тоа е прашање за нив. Но, можеме да констатираме дека 25 проценти од Албанците имаат 50 проценти од власта во Северна Македонија. Ако е ок за Македонците, ок е и за нас, само очигледно ќе имате политика која нема да ја гледаат Македонија како своја земја“,
рече Вучевиќ.
По ова реагираше Османи кој побара појаснување од Вучевиќ.
„Северна Македонија го отфрла мешањето и несоодветните забелешки од функционерите од соседството. Се залагаме за регионална стабилност и соработка, вклучително и со Р. Србија и Р. Косово. Очекуваме појаснување од министерот за одбрана на Србија“,
напиша Османи на Твитер.
Изјавите на Вучевиќ, албанскиот премиер Еди Рама ги оцени како „многу опасни“ и „неприфатливи“.