Покрај Ковачевски, со осуда за продолжувањето на штрајкот излегоа и од ДУИ, од каде што сметаат дека со оваа одлука синдикатот решил да ги стави личните интереси над интересите на учениците
Денеска започнува втората недела во која децата нема да бидат во училишните клупи. Со одбивањето на понудата за покачување на платите од 10 отсто, СОНК реши да продолжи со уцени кои се единствено на штета на образованието на учениците и им го отежнува секојдневието на родителите, напиша премиерот Димитар Ковачевски на својот фејсбук-профил.
„Владата прави сериозни напори за да се избори со кризата, да ги амортизира поскапувањата и да обезбеди достоинствен живот за нашите граѓани, пред сѐ за најранливите. И во вакви тешки услови на светска криза, ние сме веројатно единствената Влада која овозможи историско зголемување на платите и пензиите и силно финансиски ги поддржа граѓаните. И покрај сѐ, СОНК смета дека покачувањето на платите од 2.500 денари е малку. Во услови кога со антикризните мерки кои ги донесе владата сметките на граѓаните се помали за 4.000 денари месечно. Ова едноставно не може да се смета за разумен став туку за очигледен притисок со што е евидентно дека СОНК личните интереси го става пред оние на децата“,
објави Ковачевски.
Од 2017 година до денеска, како што тврди Ковачевски, платите во образованието биле покачени за 21 отсто и нагласува дека овие барања на СОНК се неприфатливи.
„Владата прави сѐ што треба за да го одржи дијалогот и да најде заеднички јазик, но барањата и односот на СОНК се целосно неприфатливи. Местото на децата е во училиштата и во оваа ситуација единствено СОНК и раководството се одговорни за тоа што тие не го остваруваат правото на образование“,
порача Ковачевски.
Покрај Ковачевски, со осуда за продолжувањето на штрајкот излегоа и од ДУИ, од каде што сметаат дека со оваа одлука синдикатот решил да ги стави личните интереси над интересите на учениците.
„Одбивањето на зголемувањето за 2 500 денари или 10 отсто на платите од страна на обединетиот Синдикат за образование, наука и култура , како и методологијата за постепено зголемување и трајно решавање на социјалниот статус на образовниот кадар е политичка агенда против учениците и родителите. ДУИ смета дека со одбивањето на понудата дадена од страна на Владата, СОНК ги става личните интереси над интересите на учениците, додека штетата оди на сметка на наставниците и учениците токму во пресрет на завршувањето на наставниот процес, бидејќи правото на образование на секое дете е загарантирано и со Уставот“,
се вели во соопштението на ДУИ.
Од СОНК вчера соопштија дека генералниот штрајк во училиштата и градинките ќе продолжи, откако Синдикатот не отстапи од своето барање за покачување на платите во образованието за 18,4 отсто.