„Уставните измени се прашања на процедура и штом се обезбеди поддршка од страна на сите, тогаш треба да започне таа процедура во која ќе учествуваат сите политички партии“, рече Ковачевски коментирајќи ги предлозите на партиите од албанскиот блок за замена на формулацијата „јазик што го зборуваат најмалку 20 отсто од граѓаните“ со албански јазик, како услов за одобрување на уставните измени
Коментирајќи ги предлозите на партиите од албанскиот блок за замена на формулацијата „јазик што го зборуваат најмалку 20 отсто од граѓаните“ со албански јазик, како услов за одобрување на уставните измени, премиерот Димитар Ковачевски потенцира дека измените треба да бидат поддржани од сите политички партии за да бидат внесени во Уставот.
„Уставните измени се прашања на процедура и штом се обезбеди поддршка од страна на сите, тогаш треба да започне таа процедура во која ќе учествуваат сите политички партии, експерти по уставно право и Министерството за правда и низ една дискусија да се дојде до целта, односно Устав кој ќе соодветствува на најголемото мнозинство кое е застапено во парламентот“,
истакна премиерот Димитар Ковачевски одговарајќи на новинарско прашање на прес-конференцијата на која ги презентираше мерките за поддршка на стопанството и граѓаните.
Според премиерот, позитивно е тоа што се разговара за уставните измени и тоа што, како што вели, веќе нема политичка партија која се противи на спроведувањето измени во Уставот.
„На почетокот знаете дека имаше политички партии, особено ВМРО-ДПМНЕ која по никоја цена не сакаше да разговара, меѓутоа сега имаат став којшто е различен и велат – да, може да се раговара со одредени услови, исто како и другите политички партии кои имаат исто свое гледање на уставните измени“,
додаде тој.
Сепак, потенцира Ковачевски, на ум треба да ги имаме приоритетите како држава, а тоа е што побрзо продолжување на патот кон Европската Унија.
„Сите политички партии треба да го имаат тоа на ум – и кога разговараме за уставните измени и за било кои други прашања и тоа да ни биде приоритет и кога ќе разговараме за уставните измени и која е целта којашто сакаме да ја оствариме, а тоа е што побрзо затворање на скрининг фазата и преговорите и отворање на преговарачките поглавја“,
Ковачевски нагласи дека се надева на успешно отпочнување и завршување на постапката за уставните измени.