Во своето обраќање од Пробиштип по повод Денот на рударите, премиерот Димитар Ковачевски посочи дека високо ја цени макотрпната работа и пожртвуваноста на рударите, како и часовите труд поминати во јама и на коповите. Затоа, како што кажа, Владата ќе продолжи да носи законски решенија и политики со кои се обезбедува подобар стандард и услови за работа за рударите
Премиерот Димитар Ковачевски денеска во Пробиштип учествуваше и се обрати на манифестација по повод одбележување на Денот на рударите.
Обраќајќи се на манифестацијата, премиерот посочи дека успесите кои ги бележи рударскиот сектор години наназад се резултат на личните заложби и на макотрпната работа на рударите, инженерите, менаџерите, стручните кадри кои со своето работење придонесуваат во неговото унапредување, а со тоа и на развојот на државата. Тоа, како што посочи премиерот, се гледа и во постигнатите резултати.
„Рударството е еден од најважните сектори и придвижувач на нашата економија дури и во време кога се соочуваме со една од најголемите кризи во поновата историја. Со повеќе од 10 отсто во вкупното индустриско производство на државата вашиот сектор е клучен за нашиот напредок. Во Република Северна Македонија имаме над 100 активни рудници кои заедно со своите придружни дејности вработуваат околу 10 000 луѓе. Убеден сум дека и понатаму овие рудници ќе продолжат со својата активна работа, со отворање нови работни места и со одржување на високите стандарди на условите и безбедност при работа за своите вработени и заштитата на околината“,
истакна Ковачевски.
Како еден од овие рудници, Ковачевски го посочи рудникот Злетово во Пробиштип, кој, како што кажа, со амбициозна стратегија и план од стечај за краток временски период, успеа да се врати во кондиција и да го рестартира производството.
„Компанијата ,’Булмак 2016′, која управува со рудникот Злетово, но и со рудникот Тораница дури и во време на криза и пандемијата е меѓу првите 30 компании во земјата според успешноста. Во целиот овој период во овие два рудника вработени се околу 800 лица, зголемено е производството и зголемени се платите на вработените во однос на претходните години“,
кажа Ковачевски.
Премиерот посочи дека во целиот овој процес на успешна работа свој придонес има и Владата, затоа што развојот на компаниите и инвестирањето во човечки капитал, како непроценлив работен потенцијал значи, како што вели, одржлив развој на општините и забрзан економски раст на земјата.
„Исправивме една огромна неправда за рударите која се провлекуваше со години наназад. Со законските измени на Законот за пензиско и инвалидско осигурување што Владата ги направи во 2018 година го исполнивме долгогодишното барање на рударите. Сега во пензија заминуваат со навршување на 40 години стаж за мажи, односно 35 години стаж за жени. Тоа значи дека ако претходно рударите се пензионирале на 58 годишна возраст, по ново во пензија заминуваат на 50 годишна возраст, а во периодот од 2018 до денес ова право го оствариле 105 рудари“,
рече Ковачевски, додавајќи дека е обезбеден и континуиран раст на платите, а дека обезбедувањето подобар стандард и услови за работа е врвен приоритет на Владата.
Во своето обраќање, Ковачевски посочи дека високо ја цени макотрпната работа и пожртвуваноста на рударите, како и часовите труд поминати во јама и на коповите. Затоа, како што кажа, Владата ќе продолжи да носи законски решенија и политики со кои се обезбедува подобар стандард и услови за работа за рударите.
„Нека е честит и вековит празникот. Ви посакувам да се живи и здрави, да напредувате на личен план и со својот труд да продолжите да придонесувате во растот на нашата економија и развојот на државата“,
заклучи Ковачевски.