В.д. директорот на ФЗО, пак, за владината одлука за еднаква вредност на платите до мај синоќа на Фејсбук му се заблагодари на премиерот Талат Џафери
Техничката влада кај нас е светски феномен и сметам дека би бил уште еден светски феномен ако влада што е задолжена да организира избори успее да падне, изјави денеска лидерот на СДСМ, Димитар Ковачевски, одговарајќи на новинарски прашања.
Тој оцени дека техничката влада ќе успее да организира фер и демократски избори и дека успешно ќе ги менаџира работите дотогаш, а како пример за тоа ја истакна вчерашната одлука во врска со платите на вработените во Фондот за здравствено осигурување (ФЗО).
„На предлог на министрите од СДСМ беше решен проблемот со ФЗО, вработените до ребалансот ќе добиваат плата што ја добиваа и во текот на декември и со тоа тој штрајк верувам дека и денес е веќе ставен во мирување“,
рече Ковачевски.
В.д. директорот на ФЗО, Асаф Абдурамани, пак, за владината одлуката синоќа на Фејсбук му се заблагодари на премиерот Талат Џафери.
„Почитувани колеги, соработници на Фондот за здравствено осигурување, денеска со премиерот Талат Џафери донесовме заедничка одлука за еднаква вредност на платите до 31 мај 2024 година. Оваа одлука ќе трае до трајното решение кое секогаш ќе биде во корист на вработените. Му благодариме на премиерот Џафери и на владиниот кабинет за стручната поддршка за надминување на овој проблем“,
напиша Абдурамани кој објави и фотографија од Џафери.
Штрајкот на вработените во ФЗО од денеска е ставен во мирување. Ваква одлука беше донесена на денешната седница на Управниот одбор на ФЗО, синдикалната организација членка на Синдикатот на УПОЗ.
„Единството помеѓу вработените во истрајноста, со цел да не се намалат платите во износ од 21 отсто, но и значењето на услугите кои ги нуди ФЗО, надлежните мораа да попуштат и да ја утврдат досегашната вредност на бодот“,
беше објавено на фејсбук-профилот на УПОЗ.
Од УПОЗ очекуваат по 31 мај одлуката за вредноста на бодот да остане иста, а во спротивно рекоа дека штрајкот ќе биде повторно активиран.