Во насока на остварување на целта Северна Македонија да биде дел од европското семејство до 2030 година, премиерот се осврна на одговорноста на Собранието и кажа дека пратениците се одговорни да носат државнички одлуки и повика на усвојување на уставните измени
Премиерот Димитар Ковачевски во вечерашното гостување на Канал 5 телевизија кажа дека целта за влез на земјава во Европската Унија до 2030 година зависи од сите нас – од Владата, од опозицијата, од академската и бизнис-заедницата како и невладините организации и медиумите, бидејќи, како што кажа, ова е процес за сите.
„Сега од нас зависи, колку брзо ќе го завршиме објаснувачкиот скрининг, колку брзо ќе го завршиме билатералниот скрининг, колку брзо ќе ги направиме потребните уставни измени и колку брзо во тие преговори сите заедно, ама кажувам сите заедно, и Владата и опозицијата и академската заедница и бизнис заедницата и невладините организации и медиумите, бидејќи ова е процес за сите, ќе успееме во тие преговори што побрзо да станеме членка на ЕУ“,
рече Ковачевски.
Во насока на остварување на целта Северна Македонија да биде дел од европското семејство до 2030 година, премиерот се осврна на одговорноста на Собранието и кажа дека пратениците се одговорни да носат државнички одлуки оти граѓаните заслужуваат да бидат дел од ЕУ.
„Како што кажав, уставните измени не се прашање на изјава туку прашање на процедура, во таа процедура учествуваат сите политички чинители во државата, како што учествуваат партиите од позицијата, така учествуваат и партиите од опозицијата. Учествуваат партии коишто имаат нормално и етнички предзнак, сите тие нормално дека ќе имаат свое видување на уставните измени во однос на тоа што треба да се унапреди во Уставот“,
рече премиерот.
Меѓутоа, додаде Ковачевски, треба да се има визија оти ова се прави заради што побрзо продолжување на патот кон ЕУ со веќе отпочнатите преговори и се со цел Северна Македонија до 2030 година да стане членка на ЕУ.
„Значи тоа е клучната цел и причина зошто треба да направиме уставни измени во кои што ќе ја збогатиме нашата држава, нашиот устав со внесување на други граѓани од државата коишто сега не се дел од Уставот, а коишто живеат тука кај нас и што ќе ја зголемиме општествената кохезија, меѓутоа и ќе ја збогатиме нашата заедница со оние кои што тука живеат меѓу нас“,
додаде премиерот Ковачевски.
Другата алтернатива, според Ковачевски, е да се биде изолиран и скаран со соседите.