„Во однос на случувањата кои ја окупираат јавноста по охридскиот настан и реториката по тоа можам да кажам дека во Република Северна Македонија не постои антибугарска омраза и хистерија како што некој сака да ги презентира. За настанот има одговорни лица со имиња и презмиња и не може цела нација да се осудува поради неколку поединци“, рече Ковачевски, одговарајќи на прашање на пратеникот Антонио Милошоски
Пратеникот го праша Ковачевски дали Владата ја разгледувала препораката од последната седница на Советот за безбедност за прогласување персона нон грата на неколку државјани на Бугарија, меѓу кои и еден европратеник, на што премиерот не одговори конкретно, но изрази уверување дека МВР ќе направи сè чествувањето да помине мирно и во најдобар ред
Министерството за внатрешни работи на денот на одбележувањето на раѓањето на Гоце Делчев и во деновите што му претходат ќе постапи согласно своите информации и извшетаите на безбедносните служби и ќе обезбеди мирно чествување на 4 февруари.
Вака гласеше дел од одговорот на премиерот Димитар Ковачевски на прашањето на пратеникот и претседател на собраниската Комисија за надворешни работи, Антонио Милошоски, дали Владата ја разгледувала препораката од седницата на Советот за безбедност за прогласување персона нон грата на неколку државјани на Бугарија, меѓу кои и еден европратеник.
Имено, Милошоски праша дали и кога ќе се разгледуваат овие препораки и кои лица досега ги имала предвид Владата, а кои според Законот за странци претставуваат ризик, односно не ги исполнуваат критериумите за зачувување на јавниот поредок во земјава и нивното дејствување ја загрозува националната безбедност и македонските меѓународни односи.
Ковачевски не беше прецизен и не одговори директно на прашањето, но потенцираше:
„Во однос на самото чествување, тоа е карактеризирано како настан со висок ризик во однос на изјавите кои доаѓаат и од внатре и од надвор и МВР е задолжено да организира мирно чествување. За таа цел МВР веќе ги презема потребните активности. Што се однесува до Законот за странци, во државата на странец може да му се забрани престој, односно влез во РСМ доколку е лице за кое во системот за контрола на патници и возила е издадено предупредување и доколку претставува закана за јавната безбедност и меѓународните односи на Република Северна Македонија. Ве уверувам дека МВР ќе направи сè согласно овој Закон чествувањето на 4 февруари да биде на најсоодветен и мирен начин“,
За седницата на Советот за безбедност, тој рече дека таа била организирана за неколку точки кои се класифицирани како строго доверливи, а од она што може да каже, премиерот посочи дека на неа било разговарано за претседавањето на земјава со ОБСЕ, односите со Бугарија во контекст на инцидентот во Охрид и одбележувањето на 4 февруари.
Во тој контекст премиерот истакна дека во С Македонија не постои антибугарска омраза како што некој сака да презентира и оти не може цела нација да се осудува поради неколку поедници.
„Во однос на случувањата кои ја окупираат јавноста по охридскиот настан и реториката по тоа, можам да кажам дека во Република Северна Македонија не постои антибугарска омраза и хистерија како што некој сака да ги презентира. За настанот има одговорни лица со имиња и презмиња и не може цела нација да се осудува поради неколку поединци“,
рече Ковачевски.
Милошоски не беше задоволен од одговорот на премиерот, а акцентот го стави на делот од одговорот на Ковачевски, каде што тој се осврна на преговорите со Европската Унија и почнатиот скрининг процес, кој е во тек.
„Премиерот изнесе една работа дека Македонија почнала преговори со ЕУ, додека министерот за надворешни работи на Бугарија вели дека не започнала и затоа нема потреба од ново вето. Сметам дека тука треба да се усогласат македонската и владата во Софија дали преговорите се почнати или не“,
рече Милошоски во врска со одговорот на премиерот.
Тој, исто така, го обвини премиерот Ковачевски за неконзистентност, бидејќи пред извесно време одредени лица ги нарекувал маргиналци, за потоа за истите тие луѓе да се разговара на седница на Совет за национална безбедност.
„Владата треба да покаже поголема решителност. Не сум задоволен од одговорот и немам дополнителни прашања“,
рече Милошоски од собраниската говорница.
Претседателот на државата Стево Пендаровски по седницата на Советот за безбедност во понеделникот, изјави дека ќе ѝ предложи на Владата да им забрани влез во државава на еден пратеник од Бугарија во Европскиот парламент и на неколку други лица – државјани на Бугарија поради дејствија што претходно ги презеле и сè уште ги преземаат против нашата држава.
Иако не го спомена со име и презиме, повеќе од јасно е дека станува збор за европратеникот од Бугарија, Ангел Џамбаски, кој е познат по националистичката и навредлива реторика кон С Македонија и македонскиот народ во историски, но и во контекст на актуелните политички случувања и настани.
Следниот ден Владата донесе заклучоци во врска со одбележувањето на денот на раѓањето на Гоце Делчев, 4 февруари, со кои го задолжи Министерството за внатрешни работи да ги преземе сите мерки за обезбедување на настанот, согласно препораките од Советот за безбедност, но не кажа ништо во врска со забраната за влез на европратеник и други бугарски државјани.