Ковачевски ги убедуваше пратениците дека уставните измени и членството во ЕУ можат да ѝ донесат само бенефит на државата, дека Преговарачката рамка, односно т.н. француски предлог е напишан во Скопје и дека тој на никој начин не задира во македонскиот идентитет, јазик и култура
Премиерот Димитар Ковачевски, како претстваник на Владата која е предлагач на уставните измени, денеска во своето обраќање пред пратениците повика на единство и обединување околу стратешката цел, членството во Европската Унија со цел, како што рече, подобар живот и стандард на граѓаните. Тој нагласи дека целиот процес се водел низ една отворена, јасна и транспарентна постапка и дека Владата нема што да крие.
Ковачевски ги убедуваше пратениците дека уставните измени и членството во ЕУ можат да ѝ донесат само бенефит на државата, дека Преговарачката рамка, односно т.н. француски предлог е напишан во Скопје и дека тој на никој начин не задира во македонскиот идентитет, јазик и култура.
„Потребен ни е прогрес, развој и интеграција за подобра сегашност и подобра иднина преку обеднувањее и остварување на националните и интересите на сите граѓани. Интеграцијата во ЕУ е највисок државен приоритет, од 1991 година до денес ништо не е променето, за мене и за огромното мнозинство граѓани. Влезот во ЕУ беше, е и ќе биде најдобриот интеграциски и политички процес. Тоа е нашиот начин да се промениме на подобро и да бидеме држава со сите стандарди. Држава со сегашност и јасна иднина“,
рече премиерот Ковачевски.
Тој ги отфрли како лажни и невистини тезите дека постои каков било дикатат од кога било.
„Постои само историска и добра можност да направиме нешто добро за државата. Не да стоиме во место и да чекаме повторно, туку да зачекориме кон полноправно членство во ЕУ до 2030 година. Ова е наш македонски предлог поддржан од цела ЕУ и од нашиот стартешки парнтнер САД. Овој предлог е за наше добро и наша корист. Ако ја видиме вистината во очи, на македонски јазик се говори и пишува во Брисел, имаме поддршка за идентитетот од најсилните држави во светот. Никој не нѐ асимилира и никој не нѐ нападна. Зад нас стојат најголемите и најсилините“,
нагласи Ковачевски.
Тој ги објасни предложените промени на Уставот укажувајќи дека тие нема да ѝ наштетат на државата и додаде дека нема потреба меѓу граѓаните да се шири хистерија и страв.
„Предлогот нема негативно да се одрази на државните атрибути и на македонската засебност на идентитетот. Уставните измени не загрозуваат ниедно македонско идентитетско прашање и тоа им е целосно јасно на сите во државата. И затоа денес кога ќе ги погледнете улиците на Скопје, гледате дека сѐ е мирно и граѓаните очекуваат одлука за својата европска иднина. Почитувањето на човековите права треба да го разбереме како наша предност, а не недостаток“,
рече премиерот.
Да се биде членка на НАТО и утре на ЕУ е добро за регионалната и државната стабилност, посебно во услови на геополитички превирања, додаде тој.
„Ние заради нас самите мора да бидеме европска држава. Знам дека овој пат не е лесен и краток. Евроскпетици секогаш има, но сите претходни примери за нас се искуство и водилка како да се движме напред. ЕУ им овозможи на новите членки подобар живот на граѓаните. ЕУ е наш најголем економски партнер. Од ЕУ имаме само бенефиции, не губиме ништо. Ние лани конечно по 17 години ги започнавме преговорите со ЕУ, скринингот тече и тоа многу успешно, мора да продолжиме понатаму, да ги отвараме поглавајата, тој процес е суштински кој ќе нѐ промени и трансформира. Тоа е наша одлука и потреба, за тоа одлучуваме во Скопје, не во Брисел и Софија. Билатералните прашања не се пречка. Ново вето од било кој и за било што нема да има. Ако сакаме да ја слушнеме вистината, таа е единствената“,
дециден беше Ковачевски.
Тој ги повика пратениците да гласаат за уставните измени и за европската интеграција на државата, за да не чмаат граѓаните уште 30 години.
„Граѓаните не се иселуваат заради Уставот, тие не стануваат и заспиваат со Уставот, туку со едниствената и нормална потреба човечка да живеат дома нормално и мирно како нивните врсници во европските градови и села. Нашата историја не е лесна, беше тешка, мачна, со многу жртви и изневерени очекувања, многу корупција, сиромаштија и најмногу од сѐ, многу неправда. Дали сакаме и понатаму да живеееме како досега или сакаме да продолжат промените кои даваат солидни резултати, дали сакаме правна држава која уште не ја постигнавме, дали сакаме повеќе ред, повеќе обврски и одговорности од политичарите, дали сакаме младо население, помалку криминалци, дали сакаме конечно да станеме правна држава на еднакви граѓани, која ќе биде за сите една мајка, а не маќеа за некој. Одговорите се да“,
рече претседателот на Владата.
За време на неговото обраќање, голем дел од пратениците на ВМРО-ДПМНЕ ја напуштија салата, а неговиот говор беше поздравен со аплауз од пратениците на владејачкото мнозинство.