Според партијата, премиерот добил насока од неговиот коалициски партнер во Владата Али Ахмети да војува со медиумите, кои, како што велат од ВМРО-ДПМНЕ, ја кажуваат вистината за состојбата во државата
Реакцијата на опозициската партија следува откако денеска на прес-конференција во Владата, премиерот Димитар Ковачевски прашан како ја коментира изјавата на неговиот коалициски партнер, лидерот на ДУИ Али Ахмети, дека Алфа и Телма се „непријатели на Албанците“, и самиот искритикува некои телевизии за тоа како се однесуваат
Коментирајќи ја изјавата на премиерот Димитар Ковачевски од денешната прес-конференција во која тој самиот искритикува некои телевизии за тоа како се однесуваат, опозициската ВМРО-ДПМНЕ преку писмено соопштение го обвини премиерот оти ги етикетира медиумите исто како и „неговиот шеф Али Ахмети“.
Според партијата, премиерот добил насока од неговиот коалициски партнер во Владата Али Ахмети да војува со медиумите, кои, како што велат од ВМРО-ДПМНЕ, ја кажуваат вистината за состојбата во државата.
„Ова е само уште еден доказ дека оваа влада на СДС и ДУИ е најнеспособната и најкриминалната влада. Димитар Ковачевски и Али Ахмети својата неспособност тие ја супституираат во автократија. Ваквото однесување од страна на автократот Ковачевски и неговиот шеф е срамно и недолично“,
се наведува во соопштението на опозициската партија.
Според ВМРО-ДПМНЕ, медиумите известуваат за реалната состојба во земјава, а тоа, како што велат, е сиромаштијата, големата инфлација, неспособноста, криминалот и корупцијата.
„Ги осудуваме константните напади врз медиумите од страна на носителите на власта и бараме веднаш да престане притисокот врз медиумите и медиумските работници и тие независно и транспарентно да ја вршат својата работа“,
додаваат од ВМРО-ДПМНЕ и ги повикаа медиумски организации веднаш да реагираат за ваквото, како што велат, етикетирање на медиумите во државата.
Реакцијата на опозициската партија следува откако денеска на прес-конференција во Владата, премиерот Димитар Ковачевски прашан како ја коментира изјавата на неговиот коалициски партнер, лидерот на ДУИ Али Ахмети, дека Алфа и Телма се „непријатели на Албанците“, и самиот искритикува некои телевизии за тоа како се однесуваат.
Во изјавата, Ковачевски кажа дека во државата има медиум чијашто уредувачка политика повеќе наликува на уредувачка политика која тргува со енергенси, а има и медиум, како што додаде, чијашто уредувачка политика повеќе личи на уредувачка политика на партиски сектор за комуникација.
Откако го изјави ова, Ковачевски потоа кажа дека не спомнал директно ниту еден медиум, а дека доколку некој се препознал во описот за медиумите кој тој го даде, тогаш, тоа е друга работа.