Дигитализацијата е нашата најсилна алатка за забрзувањето на нашето пристапување во Европската Унија и затоа е наш фокус и се наоѓа високо на владината агенда и со право можеме да кажеме дека ги имаме сите услови за дигитална трансформација, рече Ковачевски
Дигитализацијата како процес е одлика на демократски, отворени и транспаренти општества, порача премиерот Димитар Ковачевски во своето обраќање на Дигиталниот самит во Талин, Естонија.
Процесот на дигитализација, истакна Ковачевски, не само што обезбедува подобра и побрза услуга за граѓаните, туку влијае и на намалување на корупцијата која, како што посочи, игра сериозна улога во контекст на продолжувањето на европскиот пат и интеграцијата и посветеноста на зајакнување на владеењето на правото. За сите овие процеси, според премиерот, клучна ќе биде поддршката од земјите како Естонија.
„Партнерствата во оваа смисла се клучни за надминување на предизвиците. Заедничката работа е основата за остварување на споделените заеднички цели – обезбедување на отворени, транспарентни и одговорни институции кои за граѓаните обезбедуваат поквалитетни услуги, а со тоа и заштита на демократијата. Имаме јасни примери што дигитализацијата направи во Естонија и каква е придобивката за граѓаните. Ова знаење и искуство го користиме и ќе го искористиме и за понатамошни процеси. Дигитализацијата и искуството на Естонија и Балтичките земји се наши алатки кои ќе обезбедат забрзан чекор по европскиот пат и членство во ЕУ, како и имплементација на електронските услуги за граѓаните“,
рече Ковачевски.
Говорејќи за намалувањето на корупцијата и подобрувањето на владеењето на правото, тој кажа дека дигитализацијата на судниците и обвинителството ќе помогне во реформирањето на правосудството.
„Како еден од примерите, во поглавјето за правосудство и фундаментални права, јас сум убеден дека дигитализацијата на судниците и обвинителството ќе помогне во реформирањето на правосудството, ќе ја намали корупцијата и ќе го подобри владеењето на правото за граѓаните“,
порача Ковачевски.
Дигитализацијата, рече Ковачевски, е нашата најсилна алатка за забрзувањето на нашето пристапување во Европската Унија и затоа е наш фокус и се наоѓа високо на владината агенда и, како што рече тој, со право можеме да кажеме дека ги имаме сите услови за дигитална трансформација.
„Владата на Република Северна Македонија активно работи на приспособување на нашите закони за сајбер безбедност со стандардите на ЕУ и одблизу работи со нашите НАТО сојузници на оперативно ниво на зајакнување на отпорноста на нашето општество и институциите. Убеден сум дека овие две во комбинација побрзо ќе ја воведат дигиталната трансформација и безбедноста што оди рака под рака со неа. Овие предизвици се основа за нашиот фокус за иднината“,
додаде Ковачевски.
Според Ковачевски, многу е важно за регионот што преземајќи ја обврската од дигиталниот самит на Западен Балкан во 2018, земјава заедно со останатите од регионот го укинавме роамингот за нашите граѓани правејќи чекор напред во приближувањето кон Европската Унија.
„Во Северна Македонија во моментов 83 отсто од домаќинствата имаат пристап до широкопојасен интернет, а 91 отсто од компаниите користат различна технологија, како и широкопојасен интернет. Употребата на електронски услуги бара активен и интензивен ангажман за да се обезбеди европско ниво што е можно поскоро, а тоа го поставивме како приоритет во планот за дигитална трансформација наречен Дигитална Ера, како и во Националниот план за широкопојасен интернет со кој треба да се елиминираат т.н. бели зони и да се обезбеди ултрабрз интернет до оние семејства на кои им е потребен бидејќи земјата е покриена со оптика во домовите“,
додаде Ковачевски во обраќањето на Дигиталниот самит во Талин.