Од Владата истакнуваат дека на средбата била реафирмирана јасната порака на САД дека Северна Македонија, по членството во НАТО, треба да стане членка и на ЕУ, за што, нашата држава има силна и конкретна поддршка од САД
Сите политички партии во државата треба да го поддржат европскиот пат на државата, е заклучокот од средбата на премиерот Димитар Ковачевски со американската амбасадорка Анџела Прајс Агелер, на која се разговарало за суштинските прашања во врска со напредокот на Северна Македонија во евроинтеграциите.
„Како Влада, ја почитуваме добронамерноста на нашиот голем и стратешки партнер САД, како и на другите пријателски држави, членки на НАТО и ЕУ коишто нè поддржуваат во следниот исчекор во евроинтеграциите, којшто има одредувачка насока кон полноправното членство на нашата држава во ЕУ. Реално е очекувањето тоа да се случи до 2030 година и подготвени сме со уште посилен интензитет да работиме на потребните реформски процеси. Граѓаните заслужуваат да живеат во држава членка на Европа, со европски квалитет на живот и европска иднина за младите, во родната земја“,
рекол Ковачевски на средбата, пренесува владината прес-служба.
Од Владата истакнуваат дека на средбата била реафирмирана јасната порака на САД дека Северна Македонија, по членството во НАТО, треба да стане членка и на ЕУ, за што, нашата држава има силна и конкретна поддршка од САД.
„На средбата со американската амбасадорка Агелер, како и при средбата на премиерот Ковачевски со сенаторот Крис Марфи во Скопје и на средбите со високите американски претставници Блинкен и Ескобар во САД, е потврдено искреното долгогодишно пријателство и успешното стратешко партнерство помеѓу Северна Македонија и САД, коешто се развива на принципите на доверба и разбирање“,
информираат од Владата.