Од Уставен велат дека го следат остварувањето на уставноста, законитоста и слободите и правата на човекот и граѓанинот, и оти по свое наоѓање може да усвои посебен извештај или решение за неизвршени одлуки и за тоа ќе ги извести надлежните органи, но дека тоа се однесува само на закони кои се веќе во сила
Уставниот суд на Република Северна Македонија не е надлежен да ја оценува уставноста на предлог-закони, туку исклучиво на веќе донесени закони кои се дел од правниот поредок. Ова е наведено во писмениот допис испратен од претседателот на Уставниот суд, Дарко Костадиновски, како одговор на барањето од независни советници од десет општини Судот да реагира на новиот предлог-закон за измени на Изборниот законик.
Во дописот се објаснува дека Уставниот суд, од аспект на апстрактната контрола, ја оценува уставноста и законитоста на позитивното право, односно на општите прописи и акти кои се веќе важечки.
Од Уставен велат дека го следат остварувањето на уставноста, законитоста и слободите и правата на човекот и граѓанинот, и оти по свое наоѓање може да усвои посебен извештај или решение за неизвршени одлуки и за тоа ќе ги извести надлежните органи, но дека тоа се однесува само на закони кои се веќе во сила.
„Уставниот суд, извештај од аспект на член 13 од Актот на Судот, може да усвои исклучиво за закон кој е дел од правниот поредок“,
се наведува во дописот од Костадиновски.
Дописот, како што информираат од Уставен, е испратен до независни советници од осум локални самоуправи – Град Скопје, Карпош, Центар, Битола, Струмица, Босилово, Ново Село и Гази Баба, поранешните советници од групата Подобро за Тетово, како и до независниот градоначалник на Општина Кочани.
Независните советници од повеќе општини бараат Владата и Собранието итно да ја спроведат одлуката на Уставниот суд, како и да извршат автентично толкување на Изборниот законик во однос на тоа дали се овозможува учество на независните кандидати на претстојните локални избори без собирање потписи.
Независните советници велат дека одлуката на Уставниот суд ја преточиле во барања кои се поднесени уште во мај годинава до Собранието, Претседателот и сите координатори на партиите, како и до Министерството за правда.
И покрај одлуката на Уставниот суд, на еден месец пред распишување избори, има предлог на Изборниот законик кој не е изгласан, а со кој повторно се зголемува бројот на потписи потребни за кандидирање на независни кандидати. Предложениот број на потребни потписи се движи од 100 до 1 000, а за Град Скопје 3 500, што, како што велат, е решение полошо од тоа што Уставниот суд го укина во мај годинава.