Владата ја разгледа и ја усвои Информацијата за реализација на изложбата, која беше долго подготвувана од стручните тимови на Археолошкиот музеј на Северна Македонија, Националниот археолошки институт со музеј во Софија, Бугарија и со Народниот музеј на Србија во Белград
Продолжува меѓународната соработка во културата помеѓу Северна Македонија, Србија и Бугарија, со реализација на ексклузивната заедничка изложба со која беше одбележана стогодишнината од откривањето на единствената некропола во Требениште, пред пет години во Археолошкиот музеј во Скопје, сега со поставката „105 години Требениште“ во Националниот археолошки институт со музеј при Бугарската академија на науките во Софија, информира на својот фејсбук-профил министерката за култура Бисера Костадиновска Стојчевска.
Владата ја разгледа и ја усвои Информацијата за реализација на изложбата, која беше долго подготвувана од стручните тимови на Археолошкиот музеј на Северна Македонија, Националниот археолошки институт со музеј во Софија, Бугарија и со Народниот музеј на Србија во Белград.
„Требениште – приказна за случајното откритие во 1918 година, во близина на Охридското Езеро е прв и можеби единствен пример на локалитет што е истражуван од археолозите од трите земји, промовиран преку три музеи, од Скопје, Белград и Софијa. Во поставката се и прочуените златни маски кои се чуваат во Белград, Софија и една во Охрид“,
напиша Костадиновска Стојчевска на Фејсбук.
Некрополата Требеништа се наоѓа на 9 км северозападно од Охрид, веднаш покрај селото Горенци. Таа се простира на локалитетите Сува Чешма, Три Чељусти и Вртуљка, како и под самата траса на патот Охрид – Кичево – Скопје. Некрополата е случајно откриена за време на Првата светска војна од страна на бугарските војници, по што следувале и првите археолошки ископувања преземени од археолозите Богдан Филов и Карл Шкорпил. Резултатите од овие истражувања по првпат биле публикувани во 1927 година. По Првата светска војна истражувањата во Требениште ги продолжуваат српските власти.