Потребно е воведување на нови мерки во Косово, со цел спречување на ширењето на коронавирусот, смета министерот за здравство, Арменд Земај. Меѓу мерките што се разгледуваат се затворање на граничните премини и ограничување на движењето во местата што се најпогодени од ковид-19.
„Мерките како што е затворањето на границите, враќањето на здравствениот персонал на граничните премини, ограничувањето на бројот на учесници на разни манифестации, ограничувањето на движењето во областите кои се најпогодени, како и некои други мерки, се разгледуваат и ќе се постапува согласно проценката на епидемиолошката ситуација во земјата“,
рече Земај.
Целосното затворање на земјата, според првиот човек на косовското здравство, сепак останува како последна опција.
„Државата и граѓаните не заслужуваат да се вратиме таму каде што бевме пред шест месеци поради несовесното однесување на одредено малцинство. Она што се очекува, и што бездруго треба да се случи, е надлежните органи да бидат ригорозни кога е во прашање спроведувањето на законот и на одлуките на владата во однос на справувањето на пандемијата. Веднаш ќе преземеме ограничувачки мерки во секоја ситуација каде што ќе констатираме пораст на бројот на случаи, што се чини дека се случува“,
истакна Земај.
Тој рече дека паралелно со евентуалните нови мерки ќе продолжи и спроведувањето на оние што се моментно во сила.
„Косовската полиција, надлежните инспекторати, но и самата заедница треба да ги спроведуваат мерките, да не дозволат да се соочиме со критична ситуација која го поставува во тешка ситуација здравствениот систем, ги оптоварува капацитети и создава проблеми и во економски и во социјален аспект за нашата држава и нашето општество“,
истакна Земај.
Во Косово досега се евидентирани околу 18 000 заразени од новиот коронавирус, од кои 666 починале, а над 51 000 се излекувани, така што бројката на актуелни носители на вирусот моментно изнесува нешто под 2,2 илјади. Последните десетина дена се извршуваат по околу илјада тестирања, од кои како заразени резултирааат меѓу 150 и 200 случаи дневно. Во просек, дневно има од еден до два смртни случаи на пациенти заразени од ковид-19, а има денови кога, според официјалните податоци, нема ниту една жртва.