Во раните утрински часови, белгиската федерална полиција извршила претрес во канцеларијата на „Хуавеј“ во ЕУ и во домовите на лобистите за кинеската технолошка компанија под сомнение за поткуп, фалсификување, перење пари и злосторничко здружување, изјавиле луѓе блиски до истрагата за „Следете ги парите“ и белгиските медиуми „Ле Соар“ и „Кнак“
Кинескиот технолошки гигант „Хуавеј“ е во центарот на новиот случај на корупција во Брисел. Денеска, белгиската полиција изврши претрес во домовите на неговите лобисти, откриваат „Следете ги парите“ и неговите медиумски партнери „Ле Соар“ и „Кнак“.
Властите се сомневаат дека лобистите на „Хуавеј“ им дале мито на членовите на Европскиот парламент во замена за поддршка за нивната кауза во Европската Унија. Се дознава дека околу 15 поранешни и сегашни пратеници се „на радарот“ на истражителите.
Во раните утрински часови, белгиската федерална полиција извршила претрес во канцеларијата на „Хуавеј“ во ЕУ и во домовите на лобистите за кинеската технолошка компанија под сомнение за поткуп, фалсификување, перење пари и злосторничко здружување, изјавиле луѓе блиски до истрагата за „Следете ги парите“ и белгиските медиуми „Ле Соар“ и „Кнак“.
Вкупно 21 локација во Брисел, Фландрија, Валонија и Португалија биле претресени како дел од широката истрага за корупција. Запленети се повеќе документи и предмети, но не се извршени претреси во Европскиот парламент.
Акцијата започнала пред две години
Полицијата бара докази дека претставници на кинеска компанија го прекршиле законот при лобирање на членовите на Европскиот парламент (ЕП), велат извори. Рациите во раните утрински часови биле дел од истрагата на тајната полиција која започнала пред околу две години по дојава од белгиската тајна служба.
Според еден извор запознаен со случајот, „околу петнаесет (поранешни) пратеници се на радарот“ на истражителите. За сегашните европратеници, белгиските обвинители ќе мора да побараат од Европскиот парламент да им го укине имунитетот за да можат да истражуваат понатаму. Такво барање сè уште не е поднесено, велат изворите.
Канцеларијата на белгиското федерално обвинителство потврди дека неколку лица биле испрашани. Тие ќе бидат сослушани за нивната наводна вмешаност во практики на поткуп во Европскиот парламент и за фалсификување и употреба на фалсификувани документи. Се претпоставува дека делата ги извршила криминална организација.
„Операција генерација“
Истрагата со кодно име „Операција генерација“ потсетува на корупцискиот скандал во Катаргејт, наведува „Следете ги парите“. Во декември 2022 година полицијата пронашла вреќи со готовина во домовите на неколку поранешни европратеници, осомничени дека земале мито од Катар и Мароко за да ги промовираат интересите на тие земји во Брисел.
Инспекторите се сомневаат дека лобистите на „Хуавеј“ можеби извршиле слични злосторства поткупувајќи ги претставниците со скапи фудбалски билети, раскошни подароци, луксузни патувања во Кина, па дури и готовина за да ја обезбедат нивната поддршка за компанијата бидејќи таа се соочува со отпор во Европа. Плаќањата на еден или повеќе претставници, наводно, оделе преку португалска компанија, вели изворот.
Неколку земји од ЕУ во последниве години презедоа мерки за ограничување или забрана на „високоризичини“ добавувачи како „Хуавеј“ од нивните 5Г-мрежи, по предупредувањата од Соединетите Држави и Европската комисија дека опремата на компанијата може да се користи за шпионажа од страна на Пекинг. „Хуавеј“ силно ги отфрли тврдењата за вмешаност на кинеската влада.
Големи геополитички последици
Евентуалната вмешаност на „Хуавеј“, исто така, ќе биде дел од истрагата, рекоа луѓето кои се запознаени со ова прашање. Властите истражуваат осомничени криминални дејствија, вклучувајќи криминален заговор и перење пари, но не и странско мешање од Кина во оваа фаза, наведуваат извори.
Истрагата доаѓа во критично време за односите на ЕУ со Кина, нејзиниот втор по големина трговски партнер. Неодамнешните закани и царини на американскиот претседател Доналд Трамп беа прикажани како можност за зближување на ЕУ и Пекинг по години ескалација на тензиите.
„Ние би можеле дури и да ги прошириме нашите трговски и инвестициски врски со Кина“,
рече претседателката на Европската комисија, Урсула фон дер Лајен, пред амбасадорите на ЕУ минатиот месец.
Затоа, истрагата на белгиската полиција ризикува да има големи геополитички последици, особено ако властите покренат обвинение против „Хуавеј“ заедно со поединечни осомничени.
Валерио Отати
Според „Следете ги парите“, еден од главните осомничени во истрагата за корупција е 41-годишниот Валерио Отати. Белгиско-италијанскиот лобист ѝ се придружил на „Хуавеј“ во 2019 година, кога компанијата го засили своето лобирање наспроти притисокот на САД врз европските земји да престанат да ја купуваат нејзината 5Г-опрема.
Пред да стане директор за односи со јавноста во ЕУ на „Хуавеј“, Отати работеше една деценија како помошник на двајца италијански европратеници – од десниот центар и од левиот центар – кои беа членови на политичката група за Кина на Европскиот парламент.
Деталите за исходот од истрагите и осомничените би можеле да продолжат да се појавуваат во наредните денови и недели, заклучува „Следете ги парите“.