Меѓувладината конференција ќе се одржи во Скопје, но откако ќе има доволно материјал за да се преточи во документи
Следната меѓувладина конференција меѓу Скопје и Софија треба да се одржи кај нас, но откако двете страни ќе проценат дека има доволно материјал за да може да се состане меѓувладината комисија и да може да усвои документи кои потоа ќе бидат усвоени од владите. Тоа што е усогласено меѓу комисиите може да се дефинира и усвои како текст и доколку во меѓувреме има нови решенија, изјави вечерва министерот за надворешни работи, Бујар Османи за Телма.
„Досега Експертската историско-образовна комисија има усогласено текст во однос на пет историски личности, два историски периоди се начелно усогласени и тие треба да се преточат во конкретни препораки за учебниците. Тука имало некоја разлика на последната комисија, дали истите текстови кои се усогласени за заедничко одбележување, треба да бидат основа и за препораки за учебниците. Мислам дека таа разлика треба брзо да се надмине меѓу комисиите и тоа да биде добра основа да се продолжи со работата на комисијата“,
рече Османи.
Во однос на повикувањето на Бугарија на Преспанскиот договор и споредувањето со Договорот за добрососедство и пријателство, Османи вели дека двата договорасе важни и треба да се прифатат такви какви што се.
„Ниту Бугарија може да бира или да прифати или да не прифати нешто од Преспанскиот, ниту пак ние нешто да прифатиме или не од Договорот за добрососедство. Но, сметам дека со разговор и дијалог дека ќе се надминат сите тие прашања, вклучувајќи го прашањето и за придавката ‘македонски’“,
вели Османи.
Она што според него е искристализирано во изминатите четири месеци на преговори е дека Бугарија е на јасна позиција дека не ги спори идентитетските прашања.
„Јас во неколку наврати кажав дека ако нешто корисно произлезе од последните четири месеци обиди за комуникација е јасната искажана позиција на Република Бугарија дека не ги спорат идентитетските прашања. Може да видите бројни изјави на бугарски официјални претставници кои тоа го кажуваат. Оттука треба да се почне, дека ова прашање не е прашање на ревизија на идентитетските атрибути и дека историјата како предмет на историската комисија има за цел да ги коригира учебниците во двете држави што создаваат анимозитет меѓу двата народа, токсичност во амбиентот и да ги приближи двата народа, но не историјата како основа на идентитетските прашања. Во основа тука е и проблемот – недоволното разграничување околу предметот што го третира Договорот за добрососедство. Сметам дека со тек на време се повеќе се разграничува ова прашање“,
заклучи Османи.