Апасиев рече дека не добил одговор од премиерот и тоа што, како што рече, рипал од тема на тема, стручно се вика синдром на дива коза или, уште постручно, вербална дијареа
Мицкоски, откако доби можност да одговори на прашањето, прво рече дека не го разбрал, а потоа додаде дека Апасиев е последниот бастион што ги брани поранешните високи функционери од ДУИ и СДСМ
Лидерот на Левица, Димитар Апасиев, и премиерот Христијан Мицкоски денеска во Собранието имаа вербална пресметка поттикната од трагедијата што пред речиси три недели се случи во Кочани.
На седницата за опозициски пратенички прашања, на која одговараа премиерот и министрите, пратеникот Апасиев во петминутен говор, во кој се наврати на сето она што премиерот го правел од ноќта кога се случила трагедијата, на крајот постави конкретно прашање кое гласеше: До кога ќе ги штитите вашите корумпирани вмровски кадри?
Мицкоски, откако доби можност да одговори на прашањето, прво рече дека не го разбрал, а потоа додаде дека Апасиев е последниот бастион што ги брани поранешните високи функционери од ДУИ и СДСМ.
Апасиев на почетокот рече дека ќе постави само едно прашање околу невидената трагедија од европски размери, за која додаде дека е сигурен оти кога се случила, „и ние глодарите и вие мачињата таа ноќ плачевте“.
На самиот почеток тој обвини дека премиерот ноќта кога се случила трагедијата создале Кризен штаб, за кој рече дека имаме Закон за управување со кризи донесен во 2005 година, а оти во него, во член 31 се вели дека „Владата донесува одлука за постоење кризна состојба, го определува подрачјето и веднаш го известува Собранието“.
„Да ве упатам дека кризна состојба е неуставен институт според нашето уставно право. Нашиот Устав познава воена и вонредна состојба. Но, за оваа криза мора Собранието да има контрола над неа и затоа Владата писмено го известува Собранието и спикерот еднаш неделно. Ние такво известување од вас не добивме, ние како ваш контролен орган не добивме. Тоа значи дека вие уште од ноќта сте почнале да постапувате против законите“,
рече Апасиев.
Обвинувајќи го премиерот дека на првата официјална прес-конференција по трагедијата, во вториот дел сосема се изгубил и станал компромитирач на сопствената истрага.
Според Апасиев, тоа што Мицкоски објавил писмен доказ, материјален доказ од истрага, повредил две изрични норми од законот за кривична постапка.
Првиот, како што рече, е членот 2 – презумција на невиност, и вториот е член од членот 289 од Законот за кривична постапка, кој вели „сите дејствија преземени во предистражна постапка од страна на јавен обвинител или полиција се сметаат за тајна“.
„Со тоа почитуван премие вие направивте кривично дело за кое сега е обвинет вашиот телохранител, а тоа е оддавање службена тајна, односно ја компромитиравте истрагата“,
рече тој.
Во понатамошниот дел од петминутното поставување прашање, Апасиев рече дека Мицкоски направил кривично дело од член 368-а од Кривичниот законик, кој вели: „попречување на правдата“.
Цитирајќи го ставот 5, Апасиев рече дека алудира на тоа што премиерот на 18 февруари почнал со писмени траги постапка за разрешување на јавниот обвинител Љупчо Коцевски.
„И еве што наведовте во предлогот за разрешување: нарушен углед на институцијата, нема доверба, нарушени меѓучовечки односи, ги пречекорувал надлежностите, нарушена функционалност, корупција и судир на интереси. Сето ова кога стана истрагата вие викате, а не, сега нема да го разрешуваме. Дали тука не гледате елементи на нудење или давање некаква корист или, нашиот турцизам, алаш-вериш. Ти, обвинителе, нема да го чепкаш Влатко Стојковски, а јас за возврат ќе ти го продолжам мандатот“,
рече Апасиев.
Тој со поставување на прашањето „До кога ќе ги штитите вашите корумпирани вмровски кадри?“ се осврна на тоа дека директорот на Државниот пазарен инспекторат не е дел од истрагата, а на оваа функција е од ноември, а бил и кога се случила трагедијата и не презел мерки.
„Сега тој пред него е крив, само овој вашиот не е крив. Толку од вашата неселективност во истрагата. На крајот сето ова, земено на куп, има опасност да доведе до несоодветни обвиненија. Каква е таа кривична пријава за тешки дела против општата сигурност, тоа е членот 292 и алудира на членот 288 бидејќи се повикува на него“,
заврши Апасиев.
Мицкоски до Апасиев: Дали знаете кој е овој објект
Според деловникот, премиерот Мицкоски доби можност да му одговори на пратеникот и лидер на Левица, Димитар Апасиев.
Мицкоски одговорот го почна со контрапрашање до Апасиев кога од говорницата извади фотографија на која има зграда и го праша дали знае кој е тој е објект.
„Кога станува збор околу кривичните дела би сакал Апасиев да го прашам дали му е познат овој објект во центарот на Скопје. Во овој објект има еден договор за купопродажба на недвижен имот на политичката партија Левица. Политичката партија Левица со овој договор на 26.11.2024 година купила деловен имот од 409 квадратни метри на адвокатската улица, верувале или не за цена од 295 илјади евра со ДДВ или просечно квадратот на овој објект во центарот на Скопје е 721 евро, согласно овој договор. За какво кривично дело ова е, професоре?“,
праша Мицкоски.
Според него, ова е кривично дело „затоа што Градот Скопје им пресметал дека ова кривично дело е еднакво на цена за квадрат од 1 150 евра, па сте платиле данок во вредност од 739 285 денари“ и додаде дека со него ќе се позанимаваат органите.
Премиерот Мицкоски посочи дека тој објект и Универзална инвестициона банка имаат заедничко и со „Соравиа“, каде извршителот Андреја Бунески е заеднички извршител и за едниот објект и за другиот објект, па се поставува прашање дали Левица се заинтересирани и за „Соравиа“, за која, како што рече, е закажана извршителска продажба, јавно наддавање на 24 април, и е проценета за 22,4 милиони евра.
Премиерот Мицкоски се обрати до министерот за внатрешни работи и до Финансиската полиција и сите останати да проверат дали има основа за кривично дело, дали политичката партија Левица потпишувајќи го овој договор за купопродажба сторила кривично дело, така што го купила тој простор по цена од 721 евро за квадратен метар.
Премиерот Мицкоски потенцира дека кога станува збор за кривични, обвинителството и органите на истрагата треба длабински да истражат што претставува, а што е не претставува кривично дело.
Апасиев: Поднесете ми кривична пријава и вашиот министер нека ме викне во станица
Апасиев повторно излезе на говорницата велејќи дека тоа што Мицкоски не дал одговор на прашањето, туку само, како што рече, рипал од тема на тема, стручно се вика синдром на дива коза или, уште постручно, вербална дијареја.
„Зборувате за сè, само за тоа што ве прашав не зборувате. Вашите часовници вредат повеќе од таа зграда и грешно ве брифирале. Ние купивме подрумски простории со приземје, затоа е таа цената. Еве, ве охрабрувам, вака ми се закануваше и Заев мене. Да сум имал јас страв од вакви, немало да се занимавам со политика“,
додаде Апасиев.
Тој за обвинувањата од Мицкоски побара од него уште утре да му поднесе кривична пријава додавајќи дека тој ќе го направи истото во текот на наредната недела.
„Јас следната недела ќе ви поднесам за кривичното дело попречување на правдата и за оддавање на службена тајна. И нека ме викне вашиот министер во полициска станица, нека ме испрашуваат таму“,
рече тој.
Апасиев на крајот се осврна и на обвинителот за кого Мицкоски рекол дека го сретнал во Кочани.
„Обвинителот се вика Гаврил Бубевски“,
рече Апасиев покажувајќи во телефонот препорака која во 2009 година ја има дадено ОК на ВМРО-ДПМНЕ од Пехчево за вработување на Бубевски на местото јавен обвинител во Скопје.