Според Мехмедовиќ нема други случаи кои имаат клиничка слика која ќе наведе на тоа дека се работи за морбили. Тој наведува дека законските решенија за задолжителна вакцинација сè уште се актуелни и тие треба да се почитуваат
По регистрирањето на случај на морбили кај 13-месечно дете од Свети Николе, Комисијата за заразни болести денеска донесе неколку препораки кои се однесуваат на адаптација на системот во однос на следењето и менаџирањето на случаите со морбили кои може да се очекуваат во иднина во нашата земја.
Според Злате Мехмедовиќ, портпарол на Комисијата, првата препорака е да се засили епидемиолошкиот надзор врз сите осипни трески затоа што на тој начин побрзо може да се ублажи процесот на ширење на новодетектираните случаи.
„Треба да се подигне свесноста помеѓу здравствените работници и популацијата за постоење на случаи на морбили во државата. Исто така, на матичните лекари, педијатрите и инфектолозите им препорачавме внимателно да ги следат сите симптоми кои се карактеристични за морбили во државата и истите да ги пријавуваат до надлежните центри за јавно здравје. Воедно матичните лекари и педијатрите суспектните случаи да ги препраќаат до специјалисти-инфектолози за понатамошна дијагностика. Сите материјали кои ќе бидат земени од суспектните случаи треба да се испраќаат до референтната лабораторија во Институтот за јавно здравје за дефинитивна дијагноза бидејќи тоа е референтен центар за дијагностика за сите осипни трески“,
рече Мехмедовиќ по денешниот состанок на Комисијата.
Мехмедовиќ исто така рече дека ќе се направи дополнително и преглед во документацијата на сите оние кои не се вакцинирани досега или не се комплетно вакцинирани со цел да се покријат и тие дупки во системот кои може да бидат причини за појава на нови случаи со морбили.
„Секако дека треба да се засили и процесот на едукација на населението за ефикасноста и важноста на МРП-вакцината затоа што претставува најефикасен начин за контрола, односно за ублажување на последиците од морбили како болест меѓу децата“,
додаде тој.
На прашањето дали се знае изворот на заразата кај 13-месечното дете, Мехмедовиќ рече дека 13 дена пред да се појават симптомите и исипот кај детето, била направена посета на Институтот за микробиологија и на Клиниката за очни болести во Скопје.
„Посетата била затоа што детето имало инфекција на очите. Дополнително, како резултат на испитувањата од Клиниката за очни болести е испратено на Институтот за микробиологија да се земе брис. Центарот за јавно здравје како и Институтот за јавно здравје во Скопје веќе работат на епидемиолошка анализа која е поврзана со овие две места да се види дали тука има некои потенцијални случаи кои можеле да ја пренесат инфекцијата“,
додаде Мехмедовиќ.
Според него, нема други случаи кои имаат клиничка слика која ќе наведе на тоа дека се работи за морбили.
Во однос на законските решенија за задолжителна вакцинација, Мехмедовиќ рече дека тие сè уште се актуелни и тоа треба да се почитува.
„Невакцинирањето на детето има и правни последици. Како Комисија постојано апелиравме дека треба да се вакцинираат децата од аспект на тоа дека нашата одговорност е пред сè морална и дека мора да ги заштитиме децата“,
додаде тој нагласувајќи дека сè уште важи и тоа дека децата кои одат во градинка не може да бидат примени доколку не поседуваат комплетна вакцинација со сите вакцини, не само со оваа.