Илјадници луѓе синоќа присуствуваа на комеморацијата на Афроамериканецот Џорџ Флојд, кој минатиот понеделник почина, по полициската бруталност при неговото апсење во Минеаполис.
Меѓу присутните во капелата на Универзитетот во Минеаполис, имаше познати личности, активисти за граѓански права, политичари, пријатели и семејството на убиениот Флојд, откако трагичниот настан предизвика масовни антирасистички протести низ САД и во некои европски земји.
Тие му оддадоа почит на Флојд стоејќи во тишина осум минути и 46 секунди, времето колку што офицерот Дерек Шовин го држел коленото на вратот на жртвата, што се сета дека е причина за неговата смрт подоцна.
На почетокот градоначалникот на Минеаполис Џејкоб Фреј, на почетокот на комеморацијата, клекна пред ковчегот на Џорџ Флојд.
Во молитвата на свештеникот Ал Шaрптон, кој ја водеше комеморацијата, кажа дека САД никогаш не покажале величина кон црнците, алудирајќи на мотото на политиката на претседателот Доналд Трамп.
„Зборуваме за голема Америка. Голема за кого? Ние за првпат ќе ја направиме Америка голема за секого. Никогаш не беше голема за црнците. Никогаш не беше голема за. Ниту за жените“,
рече Шерптон, пренесува од Си-ен-ен.
Тој, исто така, кажа дека САД се на крстопат и дека верува повеќе од кога и да е претходно дека работите во земјата ќе се променат и дека приказната за Џорџ Флојд е приказна за црнците.
„Веќе 401 години причината што не можеме да бидеме тоа што сакаме и сонуваме е затоа што ни го притискате вратот. Време е во името на Џорџ конечно да кажеме: Тргнете го коленото од нашиот врат!“,
рече свештеникот во обраќањето.
Адвокатот на семејството Флојд, Бенџамин Крамп изјави дека не сакаат два правосудни системи во САД, од кои еден ќе биде за црнците и друг за белците.
„Џорџ Флојд не го уби пандемијата на коронавирусот, туку другата пандемија што многу добро ја знаеме во САД, пандемијата на расизамот и дискриминацијата“,
рече Крамп.
Комеморацијата во Минеаполис е прва во низата најавени комеморативните собири што ќе се одржат во уште во два града во САД.
Кауција од милион долари за помагачите
Судот во Минеаполис одреди кауција од еден милион долари за тројцата полицајци од овој град, кои се обвинети за помагање и поттикнување на убиството на Џорд Флојд.
Казната за тројцата полицајци, кои вчера за првпат се појавија пред судот, ќе може да се намали на 750 000 долари, но под одредени услови, вклучувајќи го и губењето на правото за носење на какво било лично оружје, пренесуваат британските медиуми.
Следното рочиште судијата го закажа за 29 јуни.
Откако вчера се појави наодот од обдукцијата на Флојд, според кој тој починал од срцев удар, Томас Лејн, Александар Куенг и Ту Тао се обвинети за помагање и поттикнување на убиство од втор степен и убиство од небрежност од втор степен.
Доколку бидат осудени, на тројцата им се закануваат казни од 40 години затвор.
Шoвин, полицаецот кој клечеше врз вратот на Флојд пред да умре, е обвинет за убиство од втор степен и ќе се појави на суд в понеделник.