За дел од пропустите што ги нотирал вонредниот надзор на Управата за извршување санкции веќе информираа истражните органи, Министерството за внатрешни работи и Основното јавно обвинителство за гонење организиран криминал и корупција, по чија истрага на командирот и на тројцата затворски полицајци им беше одреден притвор
Командирот на одделението, без да го извести директорот на затворот и да добие овластување од него, ја потпишал наредбата Мемети да се носи во болница, а на негов предлог затвореникот не бил сместен во специјално обезбедениот дел од возилото, туку меѓу двајца затворски полицајци, од кои едниот иако морало не бил вооружен, а другиот реагирал несоодветно и дозволил избеганиот осуденик да му го одземе оружјето
Многубројни пропусти на затворската полиција и на командирот на одделение во Казнено-поправниот дом „Идризово“ констатирал вонредниот надзор на Управата за извршување санкции (УИС) извршен по бегството на затвореникот Беким Мемети, што се случи во четвртокот, неколку минути пред полноќ.
Вонредниот надзор, како што соопшти Министерството за правда денеска, бил извршен следниот ден, односно во петокот минатата недела, за да се утврдат сите околности што довеле до тоа да се случи бегството на Мемети, кој во „Идризово“ издржуваше долгогодишна затворска казна за убиство и трговија со дрога.
Првиот пропуст што е нотиран од вонредниот надзор на Управата бил направен уште со тоа што не била повикана екипа на итна медицинска помош кога затвореникот пријавил повреда и кога била донесена одлука тој да биде спроведен за интервенција во здравствена установа.
Уште тука командирот на одделението го прекршил правилникот за овластувањата на затворската полиција и без да го извести директорот на затворот и да добие овластување од него ја потпишал наредбата Мемети да се носи во болница.
„Имено, за да биде едно осудено лице спроведено за интервенција до здравствена установа, за неговата здравствена состојба мора да се подготви упат од здравствен работник, т.е. лекар во установата, или надвор од работното време со констатација и напатствие дадено од екипа на итна медицинска помош која во овој случај не била повикана. Одлуката за да може осудениот да биде спроведен до Клинички центар ја донел Командирот на одделение и ја потпишал Наредбата за да се изврши спроводот. За да ја потпише оваа наредба, командирот мора претходно да го извести директорот на установата, што во овој случај не е направено, а директорот откако ќе биде запознаен со здравствениот проблем усно ќе даде овластување наредбата да биде потпишана“,
се наведува во соопштението од Правда.
Следниот пропуст што го констатирала Управата е местото во службеното возило на кое било сместен осуденикот. Наместо во специјално обезбедениот дел од возилото, на предлог на командирот бил сместен на седиштата во вториот дел на комбето помеѓу двајца затворски полицајци, од кои еден, кој седел до него, иако бил должен, не го носел службеното оружје.
„А, вториот затворски полицаец од кого е одземен пиштолот со кој е пукано во возилото не се однесувал со должно внимание и не го спречил дејствието при кое пиштолот му е одземен“,
се наведува во соопштението.
Од Министерството за правда посочуваат дека поради тоа што непосредните учесници во настанот, односно затворските полицајци што го вршеле спроводот и командирот на одделението што ги координирал, веднаш ноќта по бегството на Мемети беа задржани во полициска станица, службеници на Управата за извршување санкции не можеле да разговараат со нив. За текот на настанот, тие биле информирани од директорот на КПД „Идризово“ и од заповедникот на затворската полиција во установата.
Од Правда потсетуваат дека командирот на одделението и затворските полицајци кои го вршеле спроводот се суспендирани од своите работни места.
Инаку, за дел од пропустите што ги нотирал вонредниот надзор на Управата за извршување санкции веќе информираа истражните органи, Министерството за внатрешни работи и Основното јавно обвинителство за гонење на организиран криминал и корупција, по чија истрага на командирот и на тројцата затворски полицајци им беше одреден притвор.
Обвинителството во досегашниот тек од истрагата утврди дека постојат основани сомневања дека командирот на надворешно обезбедување и тројца затворски полицајци вработени во КПУ Затвор „Идризово“ во случајот сториле кривично дело противзаконито ослободување на лице лишено од слобода од чл. 373 в.в чл. 22 од Кривичниот законик.
Бегството на затвореникот Беким Мемети се случи во четвртокот пред полноќ, додека со службено возило на затворската полиција бил транспортиран од затворот „Идризово“ во Клиничкиот центар поради повреда на левата рака. Во бегството, кое било претходно планирано, беше ранет и еден од затворските чувари, на кој Мемети му го одзел пиштолот.
За тројца, обвинителството побара и доби мерка притвор. На четвртоосомничениот му е одземен пасошот.
По избеганиот Мемети веќе е распишана потерница. Пред себе имал долгогодишна казна затвор за убиство кое го сторил во 2016 година во Мала Речица.
Инаку, наодите од вонредниот надзор на Управата за извршување санкции во врска со бегството на Мемети доаѓаат истиот ден кога премниерот Димитар Ковачевски, најави смена на директорот на оваа институција бидејќи, како што истакна, не е задоволен од неговата работа.